Búgin, 18 jeltoqsan kúni Aqtaý qalasynyń 16-shaǵynaýdanynda Memleket basshysy Qasym-Jomart Toqaevtyń bastamasymen júzege asyp jatqan «Keleshek mektepteri» ulttyq jobasy aıasynda №35 jalpy bilim beretin mektep saltanatty túrde ashyldy. Bul – Mańǵystaý oblysynda atalǵan joba boıynsha iske qosylǵan on úshinshi mektep.
Jańa formattaǵy bilim berý uıymy 1 500 oqýshyǵa eseptelgen. Jalpy aýmaǵy 15 myń sharshy metrden asatyn mektepte 77 pán kabıneti qarastyrylǵan. Olardyń ishinde dızaın jáne tehnologıa, tamaqtaný mádenıeti, vızýaldy óner, úı mádenıeti, robototehnıka, STEM jáne mýzyka baǵytyndaǵy arnaıy synyptar bar. Bilim ordasy zamanaýı oqý qural-jabdyqtarymen tolyq qamtylyp, oqýshylardyń shyǵarmashylyq áleýeti men zıatkerlik damýyna qolaıly orta qalyptastyrylǵan.
Ashylý rásimine Mańǵystaý oblysynyń ákimi Nurdáýlet Qılybaı qatysyp, ustazdar men oqýshylardy jańa mekteptiń ashylýymen quttyqtady.
– Memleket basshysynyń tapsyrmasyna sáıkes óńirimizde zamanaýı úlgidegi mektepter kezeń-kezeńimen boı kóterýde. Bul bastama balalardyń sapaly bilim alyp, bolashaq mamandyǵyn erterek tańdaýyna jol ashady. Jańa mektepter tek bilim berý orny emes, oqýshylardyń qabiletin ashyp, olardyń jan-jaqty damýyna jaǵdaı jasaıtyn keńistikke aınalýǵa tıis, – dedi aımaq basshysy.
Mektep ǵımaraty erekshe bilim berýdi qajet etetin balalarǵa da beıimdelgen. Munda sensorlyq bólme, ınklúzıvti bilim berýdi qoldaý kabıneti jumys isteıdi, sondaı-aq múmkindigi shekteýli oqýshylar úshin arnaıy jedelsaty ornatylǵan. Sondaı-aq qaýipsizdikti qamtamasyz etý maqsatynda mektep ishinde 126 beınebaqylaý kamerasy ornatylyp, aýmaǵynda balalarǵa arnalǵan oıyn jáne sport alańdary salynǵan.
Aıta keteıik, buǵan deıin Mańǵystaý oblysynda «Keleshek mektepteri» ulttyq jobasy aıasynda 11 myńnan astam oqýshyǵa arnalǵan 12 mektep paıdalanýǵa berilgen. Osylaısha, óńirde joba aıasynda josparlanǵan barlyq 13 mektep tolyq iske qosyldy.
Mańǵystaý oblysy ákiminiń baspasóz qyzmeti
