Búgin, 17 jeltoqsan kúni Aqtaý qalasynda «Jas tulpar – 2025» oblystyq jastar premıasyn saltanatty tabystaý rásimi ótti. İs-sharaǵa oblys ákiminiń orynbasary Erbol İzbergenov qatysyp, jeńimpazdardy óńir basshysynyń atynan quttyqtady.

Oblystyq premıa aıasynda bilim men ǵylym, medısına, kásipkerlik, sport, mádenıet, buqaralyq aqparat quraldary jáne qoǵamdyq qyzmet salalarynda jetistikke jetken jastar 12 nomınasıa boıynsha marapattaldy. Atap aıtqanda, «Úzdik jas ǵalym», «Úzdik jas muǵalim», «Úzdik jas dáriger», «Jas kóshbasshy», «Beıbit kúnniń batyry», «Jyl jańalyǵy» syndy nomınasıalar boıynsha úzdikter anyqtaldy.

İs-sharaǵa óńirdiń belsendi jastary, volonterler, sportshylar, qoǵamdyq uıym ókilderi men aýdan-qala jastary qatysyp, jalpy sany 300-ge jýyq adamdy qamtydy.

Saltanatty jıynda sóz sóılegen Erbol İzbergenov óńirde memlekettik jastar saıasaty júıeli túrde iske asyrylyp jatqanyn jetkizdi.

– Memleket basshysy Qasym-Jomart Toqaev jastardy qoldaýdyń, olardyń otanshyl, bilimdi, eńbekqor jáne ádil bolyp qalyptasýynyń mańyzyn únemi atap ótedi. Mańǵystaýda oblys halqynyń 30 paıyzdan astamy jastar. Jastardy qoldaýǵa baǵyttalǵan jobalar men baǵdarlamalarǵa memleketten qarjy bólinip, baspana, granttar men volonterlik bastamalar iske asyrylýda. Bul úrdis aldaǵy ýaqytta da jalǵasyn tabady. «Jas tulpar» syılyǵy – el damýyna úles qosyp júrgen jastardy ulyqtaıtyn mańyzdy marapat. El ıgiligi úshin jasap jatqan qyzmetterińizge alǵysymdy bildiremin! Árbir bastamalaryńyzǵa sáttilik tileımin! – dedi ol.

Mańǵystaý oblysy ákiminiń baspasóz qyzmeti