28 qarasha kúni Aqtaý ákimdiginde qalalyq máslıhattyń kezekten tys jıyrma altynshy sesıasy ótti. Jıynǵa qalalyq máslıhat tóraǵasy Sembiǵalı Zákenov, qala ákiminiń orynbasarlary, máslıhat depýtattary qatysty.

Sesıa barysynda ońaıtylǵan deklarasıa negizinde arnaýly salyq rejımin qoldaný kezinde salyq mólsherlemesiniń mólsherin tómendetý týraly jáne Aqtaý qalasynyń shekarasyn ózgertý jóninde usynys engizý máseleleri qaraldy.

İs-sharada Aqtaý qalalyq kásipkerlik jáne aýyl sharýashylyǵy bóliminiń basshysy shaǵyn jáne orta bıznes sýbektilerin qoldaý maqsatynda usynylyp otyrǵan ózgerister men salyq mólsherlemesin tómendetý arqyly kásipkerlerge túsetin júktemeni azaıtý týraly baıandady.

Sonymen qatar jıynda jumyssyzdyq máselesi, teńiz jaǵalaýy aýmaqtaryn ıgerý arqyly týrızmdi damytý, ınfraqurylymdy jańǵyrtý, ınvestısıalyq ahýaldy jaqsartý jáne sý qorǵaý aımaǵy men beldeýiniń shekaralaryn naqtylaý qajettigi aıtyldy.

Depýtattar kún tártibindegi máseleler boıynsha suraqtar qoıyp, usynylǵan bastamalardy qoldap, tıisti sheshimder qabyldady.

Aqtaý qalasy ákimdiginiń baspasóz qyzmeti