19 jeltoqsan kúni Qaraqıa aýdanyna qarasty Quryq aýylynda táýligine 10 myń tekshe metr sý óndiretin sý tushshytý zaýyty paıdalanýǵa berildi. Saltanatty sharaǵa Mańǵystaý oblysynyń ákimi Nurdáýlet Qılybaı, aýyl aqsaqaldary men turǵyndar qatysty.

Atalǵan nysan Memleket basshysynyń sý tapshylyǵyn joıý jáne aýyldyq aýmaqtardy sapaly aýyz sýmen qamtamasyz etý jónindegi tapsyrmasy aıasynda júzege asyryldy. 

Zaýytty «Alóka» JSHS júzege asyrdy. Jalpy aýmaǵy 5 gektardy quraıtyn aýmaqta 50 uńǵymadan sý alynady. Zaýytta sý tazartýǵa arnalǵan qum súzgileri, betondy rezervýarlar jáne táýligine 5 000 tekshe metrden sý óndire alatyn eki osmos qondyrǵysy ornatylǵan.

Joba aıasynda Quryq aýyly táýligine 4 000 tekshe metr aýyz sýmen qamtylyp, sý kóleminiń qalǵan bóligi jyly jaǵajaı baǵytyna, Aqtaý qalasyna jáne Munaıly aýdanynyń Batyr aýylyna jetkiziledi.

Saltanatty shara barysynda Nurdáýlet Qılybaı sý tushshytý zaýyty óńirdiń ınjenerlik ınfraqurylymyn damytýǵa jáne aýyz sý tapshylyǵy máselesin sheshýge zor úles qosatynyn aıtty.

«Quryq aýylynda iske qosylǵan sý tushshytý zaýyty – óńir turǵyndaryn sapaly aýyz sýmen qamtamasyz etýge baǵyttalǵan mańyzdy joba. Bul joba Memleket basshysy Qasym-Jomart Toqaevtyń tapsyrmasyna sáıkes, óńirdi aýyz sýmen qamtamasyz etý baǵytynda júzege asyrylyp otyr. Atalǵan nysan halyqtyń turmys sapasyn arttyrýǵa múmkindik beredi. Aldaǵy ýaqytta da eldi mekenderdi taza aýyz sýmen qamtý baǵytyndaǵy jumystar júıeli túrde jalǵasyn tabady», – dedi oblys ákimi.

Mańǵystaý oblysy ákiminiń baspasóz qyzmeti