Búgin, 1 jeltoqsan kúni Munaıly aýdanyndaǵy Mańǵystaý aýylynda aýdandyq ortalyq emhanaǵa jańa sanıtarlyq avtokólikterdiń kiltteri tabystaldy. Bul aýyl turǵyndaryna shuǵyl medısınalyq kómek kórsetýdi jetildirý baǵytyndaǵy mańyzdy qadam. Sharaǵa Mańǵystaý oblysynyń ákimi Nurdáýlet Qılybaı, oblystyq máslıhat tóraǵasy, densaýlyq saqtaý salasynyń ókilderi men ardagerleri qatysty.

Jalpy sany 18 sanıtarlyq avtokólik aýdandyq jáne qalalyq emhanalar men aýrýhanalarǵa úlestirildi. Jańa sanıtarlyq kólikter Haval M6 bazasynda jasaqtalǵan. Olar pasıentterge alǵashqy kómek kórsetýge, sondaı-aq naýqastardy medısınalyq mekemelerge jetkizýge arnalǵan. Kólik bir mezette 3 adamdy (otyryp) jáne 1 pasıentti (jatyp) tasymaldaýǵa múmkindik beredi. Jaryq-dybystyq júıe, katalka, medısınalyq shkaf jáne qajetti jabdyqtarmen tolyq jaraqtandyrylǵan.

Óz sózinde oblys ákimi jańa kólikterdiń mobıldi toptardyń jumysyn jeńildetip, aýyl-aımaqta kórsetiletin medısınalyq qyzmettiń sapasyn arttyratynyn atap ótti.

«Memleket basshysy Qasym-Jomart Kemeluly Toqaev Joldaýlarynda atap ótkendeı, halyq densaýlyǵyn qorǵaý – memlekettiń basty basymdyqtarynyń biri. Osy tapsyrmalardy oryndaý maqsatynda óńirde medısınalyq qyzmettiń qoljetimdiligi men sapasyn arttyrý baǵytyndaǵy jumystar júıeli túrde júrgizilip keledi. Medısına qyzmetkerleriniń eńbegi – adam ómiriniń qaýipsizdigi men qoǵam ıgiliginiń kepili. Búgin tabystalyp otyrǵan avtokólikter sizderdiń jumystaryńyzdyń ónimdiligin arttyryp, turǵyndarǵa kórsetiletin qyzmet sapasyn jańa deńgeıge kóterýge yqpal etedi dep senemin», – dedi Nurdáýlet Qılybaı.

Aıryqsha atap óterligi, aýdan aýmaǵyna dál osyndaı zamanaýı sanıtarlyq kólikter alǵash ret bólinip otyr. Bul aýyl halqyna kórsetiletin medısınalyq kómekke, shuǵyl shaqyrtýǵa shyǵatyn brıgadalardyń jedeldigine, shalǵaı eldi mekenderdiń ınfraqurylymdyq qajettilikterin sheshýge jańa serpin beredi.

Sońǵy jyldary oblysta medısına mekemeleriniń materıaldyq-tehnıkalyq bazasy kezeń-kezeńimen jańartylyp, jańa densaýlyq saqtaý nysandary iske qosylyp, kúrdeli jóndeý jáne zamanaýı qurylǵylarmen qamtý jumystary qarqyn alǵan. Búgingi kólik tabystaý rásimi sol júıeli jumystardyń halyq densaýlyǵyn nyǵaıtý jáne medısınalyq kómekti jetildirý baǵytyna naqty baǵyttalǵan nátıjesiniń biri.

Jańa sanıtarlyq avtokólikter endi turǵyndarǵa ýaqtyly kómek kórsetýge, shuǵyl medısıny qyzmettiń tıimdiligin arttyrýǵa jáne aýyl halqynyń densaýlyǵyn jaqsartý isine qyzmet etetin bolady.

Mańǵystaý oblysy ákiminiń baspasóz qyzmeti