Búgin, 1 jeltoqsan kúni Mańǵystaý oblysynyń ákimi Nurdáýlet Qılybaı Grýzıanyń Qazaqstan Respýblıkasyndaǵy Tótenshe jáne Ókiletti Elshisi Levan Dıasamıdze bastaǵan delegasıamen kezdesti.
Taraptar Mańǵystaý oblysy men Grýzıa arasyndaǵy ekonomıkalyq, kólik-logıstıkalyq, týrısik jáne mádenı baǵyttar boıynsha yntymaqtastyqty keńeıtý máselelerin talqylady.
Oblys ákimi Nurdáýlet Qılybaı Mańǵystaýdyń ınvestısıalyq múmkindikterine toqtalyp, óńirdiń geografıalyq ornalasýy, kólik ınfraqurylymy jáne qolaıly ınvestısıalyq ahýaly eki jaqty seriktestik úshin mańyzdy faktor ekenin aıtty.
– Mańǵystaý óńiri – elimizdiń ónerkásiptik ortalyqtarynyń biri. Biz munaı-gaz, kólik-logıstıka, týrızm, óńdeý ónerkásibi jáne agroónerkásip salalary boıynsha ózara tıimdi jobalardy damytýǵa múddelimiz. Ásirese Kaspıı arqyly tranzıttik múmkindikterdi keńeıtý baǵytynda birlesken bastamalarǵa ashyqpyz, – dedi aımaq basshysy.
Kezdesýde Kaspıı teńizi arqyly Quryq – Alát (Ázerbaıjan) baǵytynda turaqty teńiz parom qatynasyn uıymdastyrý jobasy talqylandy. «Georgian Industrial Group» bastamasymen iske asyrylyp jatqan joba aıasynda 2026 jyldyń alǵashqy jartyjyldyǵynda eki paromdy iske qosý josparlanýda. 2027 jylǵa qaraı parom floty alty kemege deıin ulǵaımaq. Bul Kaspıı baǵytyndaǵy júk tasymaly kólemin arttyrýǵa, port ınfraqurylymyn damytýǵa jáne «Transkaspıı halyqaralyq kólik baǵytynyń» tıimdiligin kóterýge múmkindik beredi.
Óz kezeginde Elshi Levan Dıasamıdze Grýzıanyń kólik, logıstıka jáne týrızm salalarynda Qazaqstanmen, sonyń ishinde Mańǵystaý oblysymen yntymaqtastyqty nyǵaıtýǵa múddeli ekenin atap ótti.
Aıta keteıik, Mańǵystaý oblysy men Grýzıa arasyndaǵy 2025 jyldyń qańtar-qazan aılaryndaǵy syrtqy saýda aınalymy 1,9 mln AQSH dollaryn qurady. Búginde óńirde grýzın kapıtalynyń qatysýymen 51 kásiporyn jumys isteıdi.
Mańǵystaý oblysy ákiminiń baspasóz qyzmeti
