Búgin, 2 jeltoqsan kúni oblys ákimi Nurdáýlet Qılybaıdyń tóraǵalyǵymen ótken aparattyq keńeste 2025–2026 jyldarǵa arnalǵan jylytý maýsymynyń ótý barysy, Aqtaý qalasynyń qysqy daıyndyq deńgeıi jáne memlekettik qyzmetterdiń sapasy qaraldy.
Jıynda oblystyq energetıka jáne TÚKSH basqarmasynyń basshysy Berdibek Qartbaev, Aqtaý qalasynyń ákimi Ábilqaıyr Baıpaqov jáne sıfrovızasıany damytý jáne memlekettik qyzmetter monıtorıńi bóliminiń basshysy Roza Muǵalova atqarylǵan jumystar men josparlar týraly aqparat berdi.
Baıandamaǵa sáıkes, óńirdegi jylytý maýsymy turaqty rejımde ótýde. Jalpy oblys boıynsha 407 avtonomdy qazandyq, 334 bilim berý, 105 densaýlyq saqtaý mekemesi jáne 1930 kóppáterli turǵyn úı jylýmen qamtylǵan. Aqtaýda anyqtalǵan 259 aqaýdyń barlyǵy qalpyna keltirildi.
Qala ákimi Ábilqaıyr Baıpaqov bıyl jylý berý 7–10 qazan aralyǵynda bastalǵanyn atap ótti. Jylý jelilerinde anyqtalǵan 493 aqaý der kezinde joıylǵan. MAEK 300 gıgakalorıa jylý berýde, alaıda qalanyń qajettiligi — 745 gıgakalorıa. Defısıtti azaıtý úshin blokty-modýldi qazandyqtar iske qosylyp, qosymsha 67 gıgakalorıa óndirilip jatyr. Elektr jelilerin jańartý jumystarynyń 17,1 km aıaqtalyp, qalǵan bóligi jyl sońyna deıin tolyq bitirý josparlanǵan.
Óńir basshysy turǵyn úılerdiń qysqy maýsymǵa daıyndyǵyna erekshe nazar aýdarýdy tapsyrdy.
- Turǵyn úıler tolyq jylýmen qamtamasyz etildi degenmen, is júzinde birqatar úılerdiń daıyn emestigi anyqtaldy. Turǵyndar óz narazylyqtaryn áleýmettik jeliler arqyly jazýda. Iaǵnı jekelegen úılerde jylý máseleleri bar ekeni kórinip otyr. Mundaı máseleler nazardan tys qalmaýǵa tıis. Turǵyn úılerge qyzmet kórsetetin uıymdardyń jaýapkershiligin kúsheıtip, olardyń jumysyn qatań baqylaýǵa alyńyzdar», – dedi Nurdáýlet Qılybaı.
Sıfrovızasıany damytý jáne memlekettik qyzmetter monıtorıńi bóliminiń basshysy Roza Mýgalovanyń aıtýynsha, 2025 jyly oblysta 7,7 mln memlekettik qyzmet kórsetilgen. Onyń 98,2%-y elektrondy formatta iske asqan. Merzim buzýshylyqtar sany bir jylda 4 esege azaıǵan: 2024 jylǵy 106 jaǵdaıdan 2025 jyly 25 jaǵdaıǵa deıin tómendegen. Ereje buzǵan qyzmetkerlerge tártiptik sharalar qoldanylǵan.
Jıyn qorytyndysynda oblys ákimi jylytý maýsymynyń barysyn turaqty baqylaýda ustaýdy, turǵyndardyń shaǵymdaryna jedel áreket etýdi jáne memlekettik qyzmetterdiń sapasyn arttyrý boıynsha naqty sharalar qabyldaýdy tapsyrdy.
Mańǵystaý oblysy ákiminiń baspasóz qyzmeti
