Abaı oblysynyń ákimi Berik Ýálı Aıagóz aýdany turǵyndarymen kezdesýde Aıagóz aýdanynda jumys istep jatqan shet eldik azamattarǵa qatysty pikir bildirdi. Olardyń zań aıasynda eńbek etip júrgenin, oblys ekonomıkasyna úles qosyp jatqanyn aıtty.
«Qytaıdan qashpaýymyz kerek. Búkil álem Qytaı ınvestısıasyna zárý, soǵan talasyp jatyr. Olar bizdiń jolymyzdy salaıyn dep jatyr. Eger de olardyń talabyna saı jumys isteı alatyn bolsa, nege jergilikti mamandardy jumysqa tartpasqa? Tartamyz. Ózderińiz bilesizder, «Omby-Maıqapshaǵaı» kúre jolynyń «Qalbataý-Maıqapshaǵaı» jolyn salǵan kezde 200-ge jýyq jergilikti turǵyn sol jerde jumys istedi. Qarapaıym halyqty Qytaıǵa qarsy qoıýǵa bolmaıdy. Qytaı halqy álemniń barlyq elinde jumys istep júr. Sondyqtan Qytaıdan qoryqpaýymyz kerek. Olar "Aıagóz-Baqty" temir jolyn salýǵa qatysyp jatyr. Kerisinshe sizder qytaılarǵa kómektesińizder. Olar jumys isteýge keldi. Qonaq úıde turmaǵanda, qaıda turady?! Olar qonaq úıdiń ıesine aqshasyn tólep, zańdy túrde turyp jatyr. Aldaǵy 2 jyl ishinde temirjol salynady, temir joldyń boıyna basqa da adamdar keledi. Onyń bári aqsha, onyń bári bizdiń oblysymyzdyń ekonomıkasyna quıylǵan qarjy. Úlken ınvestısıa. Olardy biz qaıta tartý kerekpiz. Prezıdent Qasym-Jomart Toqaev pen Qytaı eliniń basshysy Sı Szınpınge rahmet, eki eldiń arasyndaǵy barys-kelisti arttyrý úshin vızasyz rejım jasady. Sizder de Qytaıǵa baryp saýda jasańyzdar. Qytaıdyń týrıseri osynda kelip jatyr. Úıińizdiń qasynan solarǵa qyzmet kórsetetin oryn ashyńyz. Qoı baǵyńyz, ónimin ótkizińiz. Bıyl Alakólge qanshama qytaılyq týrıser keldi. Olar osynda qalyp qoıyp jatqan joq qoı. Kelip, jumys istep jatyr. Ózińiz de Qytaıǵa, shetelge barasyz ǵoı. Olarǵa jaǵdaı jasap, keregin ózimizge alýymyz kerek. Jastardy Qytaıdan kelgen jumysshylarǵa qarsy qoımaı, kerisinshe olardyń bizge eńbek etýge kelip jatqanyn, bizdiń jolymyzdy salyp bereıin dep jatqanyn túsindirýimiz kerek. Temirjol salynatyn bolsa, el ekonomıkasyna qanshama qarjy quıylady. Temirjol Aıagózge deıin keletin bolsa, onyń kelesi kezeńi bar. Aıagózden Qaraǵandyǵa jol tartylady. Aıagózdiń ekinshi, úshinshi tynysy sonda ashylady», - dedi Berik Ýálı.
