Tanymal blogerler - erli-zaıypty Janabilovterge qatysty qylmystyq is qozǵaldy. Bul týraly qarjylyq monıtorıń agenttigi tóraǵasynyń orynbasary Jeńis Elemesov málimdedi.
Buǵan deıin Janabilovterdiń isi boıynsha appelásıalyq sottyń otyrysy ótken bolatyn. Sol kezde sýdıa blogerlerdiń áreketinde qylmystyq jaýapkershilik bar degen sheshimge keldi. Osyǵan baılanysty qarjylyq monıtorıń taǵy tergeýge kiristi.
"Materıaldar bizge tústi. Qazirgi kezde 214-bap boıynsha qylmystyq is tirkeldi. Tergeý bastaldy. Materıaldar kúni keshe ǵana túsken, sondyqtan blogerlerge qatysty sharany áli qabyldaǵan joqpyz", - dedi Elemesov senattaǵy brıfıńte.
Onyń aıtýynsha, Janabilovter elde júr. Tergeý sharalary eki aıdyń ishinde aıaqtalýy qajet.
Aıta keteri, Qylmystyq kodekstiń 214-baby (zańsyz kásipkerlik) boıynsha 20 000 aılyq eseptik kórsetkishke (2025 jylda - 7 864 000 teńgege) deıingi aıyppul salýǵa ne sol mólsherde túzeý jumystary, ıa bolmasa, 600 saǵatqa deıingi qoǵamdyq jumystar ne eki jylǵa deıingi merzimge bas bostandyǵyn shekteý nemese sol merzimge bas bostandyǵynan aıyrý jazasy qarastyrylǵan.
Eske salaıyq, Erbolat Janabylov pen Elmıra Tólegenova áleýmettik jelidegi paraqshalarynda 10 kóliktiń utys oıynyn jarıalanǵan.
