Seýl qalasynda Alatau Rise With Kazakhstan Forum ótip jatyr. Forýmnyń ashylýyna Qanat Bozymbaev qatysyp, áleýetti ınvestorlar men seriktesterge jańa Alataý City jobasyn tanystyrdy.
Qazaqstan tarapynan forýmǵa Alatau City damytý keńesiniń músheleri – Caspian Group tóraǵasy Iýrıı Shaı jáne jobanyń ınvestısıalyq seriktesi Alatau City Bank-tiń jalǵyz aksıoneri Vácheslav Kım qatysty.
Alatau City negizgi kólik dálizderiniń torabynda ornalasqan, jalpy aýdany 88 myń gektardy quraıdy. Qalanyń búkil aýmaǵy Arnaıy ekonomıkalyq aımaqtyń quramyna engizilgen. Munda korporatıvtik tabys salyǵynan, jer jáne múlik salyǵynan bosatý, sondaı-aq Alataý qalasy aýmaǵynda satylatyn taýarlarǵa nóldik mólsherlemesimen qosymsha qun salyǵyn qoldaný sıaqty jeńildikter qarastyrylǵan.
Qyrkúıek aıynda Prezıdenttiń arnaıy Jarlyǵymen Alataý qalasyna damý qarqyny ozyq qala degen arnaýly mártebe berildi. Premer-mınıstrdiń tóraǵalyǵymen qurylǵan Alataý qalasyn damytý keńesi strategıalyq sheshimder qabyldaıtyn negizgi organ bolyp sanalady. Osylaısha qala Úkimettiń tikeleı qaramaǵynda bolady.
Alatau City bolashaqta tehnologıalyq kompanıalar men eksportqa baǵyttalǵan óndiristerdiń ortalyǵyna aınalmaq. Qala qalalyq áýe mobıldigi men sýtek ekonomıkasy sıaqty maqsatty salalar boıynsha yntalandyrý baǵdarlamalaryn usynýǵa daıyn, bul baǵyttarda Qazaqstan men Koreıa tyǵyz áriptestik ornata alady.
Forýmda sóılegen sózinde Qanat Bozymbaev elektronıka, jańartylatyn energıa, medısına, bilim jáne qalalyq servısterdi sıfrlandyrý salalarynda koreı kompanıalarymen áriptestikti damytýdyń úlken áleýeti bar ekenin atap ótti.
«Búginde Koreıanyń 800-den astam kompanıasy Qazaqstannyń barlyq óńirlerinde energetıka, qurylys, qarjy, densaýlyq saqtaý, avtokólik jáne joǵary tehnologıalar salalarynda tabysty jumys isteýde. Biz birlesken jobalardy keńeıtýge, Koreıanyń ónerkásiptik jáne energetıkalyq kompanıalaryn tartýǵa múddelimiz. Ózara tıimdi yntymaqtastyqqa ashyqpyz jáne sizderdi ulttyq Alatau City jobasyna qatysýǵa shaqyramyz», — dedi Qanat Bozymbaev.
Roadshow aıasynda Qazaqstan men Koreıa Respýblıkasynyń memlekettik jáne isker qurylymdary arasynda ózara túsinistik týraly birqatar memorandýmǵa qol qoıyldy. Memorandýmdarǵa kelesi taraptar: QR Energetıka mınıstrligi men GGGI (Global Green Growth Institute); QR Kólik mınıstrligi, Korea Airports Corporation (KAC) jáne AAAG; Almaty oblysynyń ákimdigi men RETD kompanıasy qol qoıdy.
Sonymen qatar QR Ǵylym jáne joǵary bilim mınıstrligi, Koreıanyń ǵylym jáne tehnologıalar ınstıtýty (KAIST) jáne Alatau City Bank arasynda Qazaqstanda jańa ýnıversıtet qurý jáne damytý salasynda yntymaqtastyq týraly memorandýmǵa qol qoıyldy.
İs-sapar barysynda Qanat Bozymbaev Ulttyq jınalystyń depýtaty Pak Hon Gynmen, Ulttyq Assambleıa múshesi Men Son Gúmen, Saýda, ónerkásip jáne energetıka mınıstri Kım Djýng Kvanmen, Koreıanyń halyqaralyq saýda qaýymdastyǵynyń (KITA) tóraǵasy Iýn Djın Sıkpen jáne Young Business Leaders Network basshylyǵymen kelissózder júrgizdi.
Taraptar eki el arasyndaǵy saýda-ekonomıkalyq baılanystardyń turaqty damyp kele jatqanyn atap ótti. 2024 jyly Koreıa Respýblıkasy Qazaqstannyń negizgi saýda seriktesteri arasynda 10-orynǵa, al ınvestısıalar kólemi boıynsha 3-orynǵa shyqty. Taraptar yntymaqtastyqty odan ári tereńdetý jáne eki eldiń múddelerine saı jańa birlesken bastamalardy júzege asyrýǵa nıetti ekenin bildirdi.
