Bıyl Qonaev qalasynda 16 jańa aıaldama qoıyldy. Qazir olar sıfrlandyrylyp jatyr. 

Ákim jańa tehnologıalardyń engizilý jumysymen tanysty. Jolaýshylar kóligi jáne avtomobıl joldary bóliminiń basshysy Baǵdat Alıevtiń sózinshe, ár aıaldamada 4 beınebaqylaý kameralary ornatylǵan. Olar 30-50 metrge deıin adamnyń bet-álpetin, kez kelgen is-qımyldy jaqyndatyp kórsete alady. 

«Vandalızmmen kúres úshin kameralardy ornatyp jatyrmyz. Jaqyn arada olardy Jedel basqarý ortalyǵyna qosamyz. Sonda memleket múlkin búldirgenderdi tez arada taýyp alýǵa múmkindik týady», - dedi ol.

Sonymen qatar nysannyń ishinde telefondy qýattaǵyshtar men avtobýstardyń baǵyttaryn, qozǵalysyn kórsetetin baǵdarlamasy bar monıtor qoıylǵan. Tegin Wi-Fi ornatý maqsatynda iri kompanıalarmen kelissózder júrgizilýde. 

«Aıaldamalar avtobýstar júretin ýaqytta ǵana ashyq bolady. Bul - tazalyqty, qoǵamdyq tártipti saqtaý úshin jasalatyn amal», - dedi bólim basshysy.