Qyrǵyz prezıdent ákimshiligi Konstıtýsıaǵa ólim jazasyn engizýge múmkindik beretin ózgertýler men tolyqtyrýlar engizý týraly zań jobasyn qoǵamdyq talqylaýǵa shyǵardy. Qujatta balalardy zorlaý jáne zorlaýmen baılanysty kisi óltirý úshin ólim jazasyna ruqsat berý usynylady.
Kaktus.media-nyń habarlaýynsha Konstıtýsıanyń 25-babynyń birinshi bóligi jańa redaksıada jazylady. Onda ár adamnyń ómir súrýge ajyramas quqyǵy saqtalady, biraq qosymsha tarmaq engizilip, «ólim jazasy tek balalardy zorlaý jáne zorlaýmen ushtasqan kisi óltirý úshin ǵana qoldanylýy múmkin» dep kórsetiledi.
Atalǵan zań jobasynyń maqsaty - «balalar men áıelderdiń ómiri men densaýlyǵynyń qaýipsizdigin jáne qylmystyq shabýyldardan qorǵalýyn qamtamasyz etý».
Statısıkalyq derek boıynsha 2024 jyly áıelder men balalardy óltirý boıynsha 43 qylmys tirkelse, 2025 jyldyń segiz aıynda 28. 2024 jyly 107 zorlaý deregi tirkelgen jáne onyń 88-i kámeletke tolmaǵandarǵa qatysty bolǵan.
Zań jobasyn talqylaý koomtalkuu.gov.kg portalynda bastaldy. Mundaı zań jobasyn talqylaýǵa 17 jastaǵy Aısulýdyń ólimi sebep bolǵan. Bul oqıǵa qoǵamda úlken rezonans týdyrǵan bolatyn. Zań jobasyna qatysty sarapshylar men áleýmettik jeli qoldanýshylardyń pikiri ekige bólindi.
Prezıdent Sadyr Japarov bul másele tek jalpyhalyqtyq daýys berý arqyly sheshilýi tıis ekenin málimdedi.
Aıta keteıik, Qyrǵyzstanda ólim jazasy buǵan deıin bolǵan. Alaıda 2007 jyly bul jaza alynyp tastalyp, ornyna ómir boıyna bas bostandyǵynan aıyrý jazasy engizilgen edi.
