UBT-nyń sapasyn arttyrý jumysyna álemniń eń myqty kompanıasy tartylady. Bul týraly ǵylym jáne joǵary bilim mınıstri Saıasat Nurbek málimdedi.
Memleket basshysy Nú-Iorkke jasaǵan jumys sapary barysynda Educational Testing Service (ETS) kompanıasynyń basshylyǵymen kezdesken bolatyn. Búginde kompanıa jyl saıyn álem boıynsha 180 memleketke 50 mıllıonnan astam test ázirleıdi. Sondaı-aq ulttyq bilim berý júıesine arnalǵan beıindik sheshimderdi usynady. Al Qazaqstan tarapynan kompanıanyń tájirıbesin paıdalanýǵa qyzyǵýshylyq bar.
Ǵylym jáne joǵary bilim mınıstri Saıasat Nurbektiń aıtýynsha, 80 jyldyq tarıhy bar ǵylymı ortalyq testerdi ázirlep qana qoımaı, testologıany zertteýmen de aınalysady.
"Bizdiń ulttyq biryńǵaı testileýdiń sapasyn kúrt ózgertý men mazmunyn tolyqqandy qarastyrý sharalary osy eń iri, eń ataqty testologıa ortalyǵymen birge atqarylady. Ol úshin arnaıy jumys toby qurylady. ETS-tiń eń myqty mamandaryn tarta otyryp, ulttyq biryńǵaı testileýdiń mazmuny men ádistemesi qaıta qaralady", - deıdi Nurbek.
Kelesi aıda zertteýshilerdiń úlken delegasıasy Qazaqstanǵa keledi. Olar UBT-nyń transformasıasyn jasaıdy.
"Biz UBT-ny eń sapaly suraqtary bar halyqaralyq testke aınaldyramyz", - dep atap ótti mınıstr.
