Qazaqstan "Beıneý – Sekseýil" jáne "Bozoı – Shalqar" trassalaryna 800 mlrd teńgeden astam qaryz alady, dep habarlaıdy "Aq Jaıyq" portaly.
Serik Jumanǵarınniń tóraǵalyǵymen Halyqaralyq qarjy uıymdarymen jıyn ótti. Otyrys barysynda qatysýshylar iri ınfraqurylymdyq jobalardy memlekettik kepildikpen iske asyrý úshin Eýropalyq Qaıta Qurý jáne damý banki (EQDB), Halyqaralyq Qaıta Qurý jáne damý banki (HQDB), Azıa ınfraqurylymdyq ınvestısıalar banki (ABII) jáne Islam Damý Bankinen (IDB) qarjy tartý máselelerin talqylady.
Transkaspıı halyqaralyq kólik marshrýtynyń quramyna kiretin "Beıneý - Sekseýil" avtomobıl jolynyń qurylysyna erekshe nazar aýdaryldy. Memleket basshysynyń tapsyrmasy boıynsha jaqyn arada "Beıneý – Sekseýil" jáne "Bozoı – Shalqar" ýchaskelerin qosa alǵanda, jalpy uzyndyǵy 765 km jańa avtojol qurylysyn bastaý kerek. Kólik mınıstrligi tehnıkalyq-ekonomıkalyq negizdemeni aıaqtaý jáne qurylys jumystaryn bastaý aldaǵy kezeńge josparlanǵanyn habarlady. Eýropalyq Qaıta Qurý jáne damý banki men Halyqaralyq Qaıta Qurý jáne damý banki 800 mlrd teńgeden astam qarajat bóletini týraly mandattyq hattar jiberip, jobany qoldaýǵa daıyn ekendikterin rastady.
Sondaı-aq QTJ "UK "AQ Transkazaqstandyq temirjol dálizin damytý boıynsha" jobasyn Halyqaralyq Qaıta Qurý jáne damý banki jáne Azıa ınfraqurylymdyq ınvestısıalar bankimen birlesip iske asyrý máselesi talqylandy.
Arnaıy ekonomıkalyq jáne ındýstrıalyq aımaqtarda ınjenerlik-kommýnıkasıalyq ınfraqurylym salý máselesi boıynsha Islam Damý Bankimen yntymaqtastyq jeke qaraldy.
Bul ınfraqurylymdyq jobalardy iske asyrý eldiń halyqaralyq tranzıttik dáliz retindegi áleýetin edáýir nyǵaıtýǵa múmkindik beredi, sondaı-aq ekonomıkalyq tartymdylyqty arttyrýǵa jáne iskerlik ortany damytýǵa eleýli úles qosady.
