Almaty oblysy Jambyl aýdanyndaǵy № 01098 áskerı bólimde qaza bolǵan 19 jastaǵy sarbaz Dinmuhamed Shynarbekti týystary onyń óz-ózine qol jumsaǵanyna senbeıdi. Sarbazdy búgin týystary jer qoınyna tapsyrdy dep habarlaıdy Ulysmedia.

Marqum Dinmuhamed Shynarbektiń ápkesi Toǵjan Qoshanbaeva inisiniń asylyp ólgenine senbeıdi. Ol áskerı bólimdeni sarbazdarmen sóılesken. Sózinshe, sarbazdardyń barlyǵy Dinmuhamed óz-ózine qol jumsaıtyn jaǵdaıda bolǵan joq degen.

«Qasynda júrgen qyryq sarbazdyń barlyǵymen men keshe sóılestim. Ol ómirin ózi qıatyn bala emes dedi. Bul jerde bir jaǵdaı boldy. Óltirdi. Odan keıin ony ildi. Ofıserlik quramnyń da ishinen shyǵyp jatyr, «jap-jaqsy bala, ashyq-jarqyn. Eshqandaı qınalys, ondaı kórsetpegen bala. Kúlip, boryshyn jaqsy atqaryp júrgen bala» dep. Olarǵa aıttym, nege onda osyndaı boldy... Olaı bolsa sender óltirdińder. Ondaı jaǵdaı bolsa, óltirip, asyp qoıdyńdar. Ol bala ózi baryp, asylatyn jaǵdaı emes. Keshe maǵan kórsetken, aıtqan jaǵdaıda, adam ózi baryp, qolyn baılap, ózi úlken dińgek aǵashqa asylýy múmkin emes. Ol bala ondaı nárseni isteı almaıdy. Bunyń barlyǵy qoldan jasalyp otyrǵan nárse», – deıdi ol.

Eske salaıyq, búgin áskerde taǵy tragedıa oryn aldy. Mátibulaq aýylynda ornalasqan №01098 áskerı bóliminde 19 jastaǵy merzimdi qyzmettegi sarbaz Dinmuhammed Shynarbek óli tabyldy. Jaqyndarynyń aıtýynsha, jas jigittiń ólimine qatysty shynaıy jaǵdaılar muqıat jasyrylyp otyr. Ápkesiniń sózinshe, 2024 jyldyń kúzinde áskerge Danıal Shynarbek shaqyrylsa, kóktemde onyń egizi Dinmuhammed ásker qataryna alynǵan. Ekeýi de Otar garnızonynda qyzmet etken.

17 qyrkúıekte týystaryna Dinmuhammedtiń ózine qol jumsaǵany týraly habar kelgen.