İshki ister mınıstrligi búginnen bastap stalkıng úshin qylmystyq jazanyń engizilgenin eskertti, dep habarlaıdy Polisia.kz portaly.
Zańǵa engizilgen túzetýlerge sáıkes, zorlyq-zombylyq qoldanylmasa da, adamnyń psıhologıalyq jaǵdaıyna eleýli zıan keltiretin áreketter stalkıng retinde qarastyrylady. Olar:
- aıtarlyqtaı zıan keltirip, adamnyń jeke shekarasyn buzý;
- erkinen tys izine túsý;
- qaıta-qaıta telefon soǵý;
- ınternet arqyly baqylaýmen qorqynysh nemese alańdaýshylyq sezimin týdyrý.
Budan bylaı, mundaı áreketter úshin qylmystyq jaza qoldanylady. Kodekste birneshe jaza qarastyrylǵan:
- 200 AEK-ke deıin aıyppul (2025 jyly 786 400 teńge);
- 200 saǵatqa deıin qoǵamdyq nemese túzeý jumystary;
- 50 táýlikke deıin qamaýǵa alý.
Sonymen qatar 16 qyrkúıekten bastap Qylmystyq kodekske jańa 125-1-baby "Nekege májbúrleý" engizildi. Endi bul áreket qylmystyq quqyqbuzýshylyq retinde tanylady.
