«Astana EKSPO-2017» ulttyq kompanıasynyń burynǵy basshysy Talǵat Ermegıaevke qatysty sot úkimi 10 maýsymda shyǵady, - dep habarlaıdy Qamshy.kz.

Ermegıaevtiń isi boıynsha úkim kelesi aptanyń jumasynda, 10 maýsym kúni saǵat 16.30-da jarıalanady. Bul týraly búgin Talǵat Ermegıaevtiń isi boıynsha sot otyrysy barysynda málim boldy.

Esterińizge sala keteıik, Astana qalasynyń  qylmystyq ister jónindegi mamandandyrylǵan aýdanaralyq sotynda «EKSPO-2017» UK» AQ-nyń burynǵy basshysy Talǵat Ermegıaev pen taǵy 22 adamnyń búdjet qarajattaryn asa iri kólemde jymqyrý isi boıynsha  tyńdaý jalǵasyp jatyr. «EKSPO-2017» UK» AQ-nyń burynǵy basshysy Talǵat Ermegıaevke qatysty qylmystyq is bıylǵy jyldyń  10 naýryzynda Astana qalasy qylmystyq ister jónindegi mamandandyrylǵan aýdanaralyq sotyna tapsyrylǵan bolatyn.

4 sáýirde ótken alǵashqy sot otyrysynda 14 sottalýshy óz kinálerin moıyndap, istegen isteri úshin ókinetindikterin málimdegen. Olar Talǵat Ermegıaevke  para berilgenin moıyndap,  birqatar jalǵan aktiler jasalǵany, zańsyz aqshany qolma-qol aqshaǵa aınaldyrý júıesi týraly aıtyp bergen edi.

Jalpy alǵanda aty shýly is boıynsha bas aıyptalýshyǵa 4,2 mıllıard teńgeni qaltasyna basty degen aıyp taǵylyp otyr. Aıyptaýshy taraptyń ýáji boıynsha, ol qyzmet babyn paıdalanyp aqsha urlaǵan.

Sotta sóılegen sońǵy sózinde T. Ermegıaev ózine taǵylǵan aıyptardyń eshqaısysymen kelispeıtinin, ózin temir tordyń arǵy jaǵynan kórgisi keletin múddeli toptardyń bar ekenin málimdedi. 

Barlyǵy atalǵan is jumys júrgizý barysynda qoldaý úshin merdiger kompanıalardan para alýǵa baılanysty iri bes epızodqa bólingen.