Soltústik Koreıa lıderi Kım Chen Yn óz áskeriniń Reseı jaǵynda Ýkraınadaǵy soǵysqa qatysýyn madaqtap, "jeńilmeıtin armıa" dep atady. Olardyń «álemge KHDR armıasynyń bedelin kórsetkenin» aıtty. Bul týraly memlekettik KCNA agenttigi habarlady.

Úsh kúndik partıa plenýmyn qorytyndylaı otyryp, Kım sheneýnikter arasyndaǵy «jańsaq oılaý», «jaýapsyzdyq» jáne «jaman ádetterdi» synady. Ol tártip buzýshylyqtardy joıý kerektigin eskertti.

Ońtústik Koreıa barlaýynyń dereginshe, Ýkraınadaǵy soǵysta keminde 600 soltústikkoreıalyq ásker qaza tapqan, myńdaǵany jaralanǵan.

Kım Chen Yn shetelge jiberilgen soldattar «eldiń halyqaralyq abyroıyn arttyrdy» dep baǵalady jáne qorǵanys kúshterin «jahandyq ózgeristerge» saı jańǵyrtý týraly aıtty.

Aldaǵy jyly ótetin partıa kongresinde Phenánnyń AQSH pen Ońtústik Koreıaǵa qatysty jańa saıasaty jarıalanýy múmkin. Bul kongres Soltústiktiń Seýlmen qarym-qatynasyn odan ári qataıta ma, joq pa – mańyzdy kórsetkish bolmaq.

Ońtústik Koreıa prezıdenti Lı Chje Món qaıshylyqty azaıtýǵa qadam jasasa da, Kım Chen Yn dıalogqa qyzyǵýshylyq tanytpady.