Bir jylǵa jýyq jasyrynǵan Nobel laýreaty Osloǵa jetti. Saıası qýǵynnan qashyp júrgen venesýelalyq Marıa Korına Machado Oslodaǵy Nobel beıbitshilik syılyǵyn alý úshin jasyryn jaǵdaıda kelip, alǵash ret 11 aıdan keıin kópshilik aldyna shyqty.

58 jastaǵy Machado tún ortasynda qonaqúı balkonynan qol bulǵap, jınalǵan qoldaýshylaryn qýantty. Ol elden qupıa túrde shyǵyp, 10 áskerı beketten ótip, qaıyqpen jasyryn jolmen ketýge májbúr bolǵan.

Machado Nobel syılyǵyn «Venesýelada dıktatýradan demokratıaǵa beıbit ótýdi qamtamasyz etý jolyndaǵy kúresi» úshin ıelendi. Ol Norvegıaǵa sapary úshin Venesýela bıligi ózin «terrorıst» dep aıyptap, qamaýǵa alýǵa buıryq bergenin aıtty.

«Qandaı qaýip baryn jaqsy bilemin. Biraq men mindetti túrde Venesýelaǵa qaıta oralamyn», – deıdi ol.

Marıa Korına Machado Nobel komıtetimen birge otyrǵan suhbatta «maǵan Osloǵa jetýge kómektesken adamdar ómirin qaterge tikti» dep kóz jasyn tyıa almady. 

Machado bir jyldan astam ýaqyt jasyryn túrde ómir súrip keledi. Norvegıadaǵy saltanatta onyń ornyna qyzy Ana Korına Sosa sóz sóılep, anasynyń «Venesýela qaıta tynystaıdy» degen úndeýin jetkizgen.

Buǵan deıin Nobel komıtetiniń tóraǵasy Iorgen Vatne Frıdnes Machadonyń «asa qaýipti jaǵdaıdaǵy uzaq sapardan keıin» Osloǵa kele jatqanyn, biraq rásimge úlgermegenin aıtqan. Keıinirek Machado aýdıojazbada ózin elden shyǵaryp áketkenderge alǵys bildirip, «jaqynda jetemin» dep habarlaǵan.

Saltanatqa Latyn Amerıkasy elderiniń prezıdentteri, sondaı-aq Machadonyń kandıdatýrasyna almastyrylǵan ári saılaýda jeńdi dep esepteletin Edmýndo Gonsales qatysty. Norvegıa koróldik otbasy da rásimde boldy.

Pıanıs Gabrıela Montero Venesýeladan ketken 8 mıllıon bosqynnyń saǵynyshyn beıneleıtin Mi Querencia týyndysyn oryndady.