Búgin, 8 jeltoqsanda oblys ákimi Nurdáýlet Qılybaıdyń tóraǵalyǵymen Mańǵystaý oblysynyń tótenshe jaǵdaılardyń aldyn alý jáne joıý jónindegi komısıa otyrysy ótti. Jıynda óńirdiń qys mezgiline daıyndyǵy, kópqabatty turǵyn úıler mańyndaǵy órt qaýipsizdigi jáne bıologıalyq qaýipsizdik máseleleri talqylandy.
Energetıka jáne turǵyn úı-kommýnaldyq sharýashylyq basqarmasynyń málimetinshe, óńirde jylytý maýsymy belgilengen merzimde bastalyp, birqalypty ótip jatyr. Injenerlik ınfraqurylymdy jóndeý jumystary júrgizilip, jylý, sý, gaz jáne elektr jelileri jańartyldy. Aqtaýda jylý berý kezinde anyqtalǵan 259 aqaýdyń barlyǵy joıyldy.
Óńirdegi respýblıkalyq, oblystyq jáne aýdandyq joldardyń qysqy kútimge ázirligi saqadaı saı. Qajetti materıaldar men tehnıkalar daıyndalǵan. Mańǵystaý joldaryn kútip-ustaý jumystaryna 412 jumysshy men 155 tehnıka jumyldyrylǵan. Qysqy jaǵdaıǵa qarsy ınertti materıaldar, janar-jaǵarmaı qorlary tolyq daıyn, joldar boıyndaǵy sý ótkizgish qubyrlar tazartylǵan.
Sondaı-aq Aqtaýda bıik turǵyn úılerdiń kóbeıýine baılanysty órt sóndirý tehnıkalarynyń aýlalarǵa erkin kirýi boıynsha másele bar. Osyǵan baılanysty qala ákimdigine bıik úılerdiń aýmaqtarynda órt tehnıkasyna arnalǵan arnaıy joldar men alańdardy belgileý usynylǵan.
Sanıtarıalyq-epıdemıologıalyq baqylaý departamentiniń basshysy Muhtar Serbaev óńirde sanıtarıalyq-epıdemıologıalyq jaǵdaı jalpy turaqty bolǵanymen, JRVI, tumaý, taǵamnan ýlaný jáne V gepatıti sıaqty aýrýlar boıynsha ósim baıqalǵanyn baıandady. Sondaı-aq oba, tyrysqaq, sibir jarasy, kókjótel jáne birqatar qaýipti aýrýlar tirkelmegen.
Otyrys qorytyndysy boıynsha oblys ákimi jaýapty mekemelerge qysqy qaýipsizdikti qamtamasyz etý, órt jáne bıologıalyq qaýipterdiń aldyn alý boıynsha naqty tapsyrmalar berdi.
«Óńir turǵyndarynyń qaýipsizdigin qamtamasyz etý – bizdiń basty mindetimiz. Árbir adamnyń ómiri men densaýlyǵy mańyzdy. Osyǵan baılanysty barlyq jaýapty mekemelerge ózderine júktelgen mindetterdi tolyq ári ýaqytyly oryndaýdy tapsyramyn», – dedi Mańǵystaý oblysynyń ákimi Nurdáýlet Qılybaı.
Mańǵystaý oblysy ákiminiń baspasóz qyzmeti
