Kókshetaýda ótip jatqan jer komısıasynyń otyrysynda saıasatker Muhtar Taıjan agrobank qurýdy usyndy, - dep habarlaıdy Qamshy.kz.

Saıasatker aýylsharýashylyǵy men aýyldyq óńirlerdi qoldaýmen aınalysatyn qarjy uıymyn qurý arqyly Ulttyq bank qarjysyn tıimdi usynýǵa bolatynyn aıtady.

«Aýylǵa nege kómektespeımiz. Ulttyq qordan 10 mlrd aýylǵa nege bermeske? Tek dıhandarǵa ǵana emes, ol aqshany jol, gaz, sý, medısına jaǵynan nege kómektespeske?», - degen saıasatker agrobank arqyly aýyldyń kóptegen problemasyn sheshýge bolatynyna senimdi.

M. Taıjannyń bul usynysyn depýtat V. Kosarev te qoldady. 

Sondaı-aq, M. Taıjan mıtıńke qatysqandardy qýdalaý máselesin de kóterdi.

«Qýdalaý týraly aıtýǵa májbúrmin. Ótkende 15 táýlikke qamalǵandar shyǵa bastady. Biraq, Maks Boqaev, Janat Esentaev, Mahambet Ábjan, Talǵat Aıan syndy jigitterdiń ústinen qylmystyq is ashyldy. Óte aýyr baptermen ashyldy. Taǵy da aıtamyn, azamattardy qýdalaý toqtatylsyn! Mıtıńke shyqqan adamdardy jamandaýdy toqtataıyq. Olar da bizdiń adamdarymyz. Men ózim de mıtıńige ótinish bergen adammyn. Tıisti organdarǵa taǵy da úndeý jasaımyn, qýdalaýdy toqtataıyq. Osyndaı ústel basynda ortaq sheshimge keleıik, qýdalaý kerek emes», - deıdi M. Taıjan.