Búgin Astanada Úkimettiń kezekti otyrysy ótti, dep habarlaıdy «Qamshy» portaly. Jer komısıasynyń birneshe múshesi qatysqan selektorlyq otyrystyń negizgi taqyryby «Jer máselesi» boldy deýge bolady.
Áleýmettik jeliden tikeleı kórsetilgen Úkimet otyrysyn 5 myńdaı qazaqstandyq baqylady.
Birinshi bolyp sóz alǵan Ulttyq ekonomıka mınıstri Tımýr Súleımenov orys tilinde baıandama jasap, Úkimettiń 2017 jylǵy búdjet parametrlerin qaıta qaraıtynyn jetkizdi.
«Birinshi baǵyt aıasynda (İshki jalpy ónim ósimine qol jetkizý) búdjettiń úılestirilýin retteý maqsatynda aqpanda áleýmettik-ekonomıkalyq boljam men 2017 jylǵa arnalǵan respýblıkalyq búdjettiń parametrleri qaıta qaralady»,- dedi mınıstr Úkimet otyrysynda.
Jalpy basty 9 baǵyt boıynsha 148 is-shara josparlanǵan. Onyń ishinde ishki jalpy ónim ósimine qol jetkizý, jeke sektordy damytý jáne básekelestikti kúsheıtýge jaǵdaı jasaý, jeke ınvestısıany tartýǵa basymdyq bere otyryp, ekonomıkany qarjylandyrýdy qamtamasyz etý, jappaı kásipkerlikti damytý arqyly turǵyndardyń tabysyn arttyrý sharalary eskerilgen.
Sondaı-aq, memlekettik satyp alý men kıbershabýyldarǵa qarsy turý máselesi de aıyryqsha qaralǵan.
Odan keıin sóz alǵan Qarjy mınıstri Baqyt Sultanov, İİM mınıstri Qalmuhambet Qasymov, Investısıa jáne Damý mınıstri Jeńis Qasymbekter baıandamalaryn orys tilinde jasady.
Sóz alǵan energetıka mınıstri Qanat Bozymbaev bastan-aıaq qazaq tilinde baıandama jasady.
Munaı óndirý týraly josparlarmen bólisken ol, Qashaǵan men Qarashyǵanaqta óndirilýi josparlanyp otyrǵan munaı men gazdyń, sondaı-aq, kómir óndirýdiń josparlaryn aıtty.
QR Mádenıet jáne sport mınıstri Arystanbek Muxamedıuly mádenıet nysandarynyń qol jetimdiligin arttyrýdyń ádisin Úkimetke usyndy.
Mınıstrdiń sózinshe, ár aıda bir márte mýzeıler, jylyna tórt ret teatrlar halyq úshin tegin bolady.
«Halyqtyń mádenıet nysandaryna qol jetimdilik tájirıbesin engizý. Ár aıdyń úshinshi jeksenbisinde mýzeılerge jáne jylyna tórt ret teatrlarǵa, olar: dúnıejúzilik Teatr kúni, 27 naýryzda, Balalardy qorǵaý kúni, Táýelsizdik kúninde tegin barýdy qamtamasyz etý usynylady. Sondaı-aq mektep demalystary sheńberinde oqýshylar úshin teatrlar men mýzeılerge tegin barý usynylady. Nátıjesinde jyldyń aıaǵyna deıin atalǵan mádenıet nysandaryna barý kórsetkishi 45 paıyzǵa deıin jetetin bolady», - dep atap ótti mınıstr Úkimet otyrysynda.
QR Bilim jáne ǵylym mınıstrligi mektepterde árbir oqýshyny jeke shkaftarmen qamtamasyz etpek. Bul týraly búgin Úkimet otyrysynda Erlan Saǵadıev málim etti.
«Oqýlyqtardy, aıaq kıim men sporttyq jabdyqtardy saqtaý úshin mektep oqýshysyn jeke shkafpen qamtamasyz etý álemdik tájirıbe. Bul jobany biz mektep dırektorlarymen, órt sóndirýshilermen, sanıtarlyq-epıdemıologıalyq qadaǵalaý salasynyń ókilderimen uzaq talqyladyq. Bul baǵyttaǵy qadamdar óz kezeginde kóptegen problemany sheshedi, onyń ishinde oqýshy rúkzagynyń aýyrlyǵyn jeńildetedi. Árbir balada jeke shkafy bolýy tıis»,- dedi mınıstr.
Sondaı-aq, ol ár synypta Wi-Fi ishki jelisin ornatý týraly da aıtty.
«Búginde ınternet mektepterdiń basym bóligine kelip otyr, "Sandyq Qazaqstan" aıasynda biz osy máseleni sheshýdi josparlap otyrmyz. Alaıda ár synypta Wi-Fi ishki jelisin ornatý da mańyzdy másele. Biz Qazaqstan mektepterindegi qurylymdyq kabel júıesimen qysqa merzimde qamtamasyz etý boıynsha iri jobany josparlap otyrmyz. Bul jumysty oryndaýda tájirıbe aıasynda stýdentterdi tartamyz degen úmitimiz bar, biraq qurylǵylardy jergilikti atqarý organdary satyp alýy kerek, bul qymbat emes», - dep habarlady úkimet otyrysynda bilim jáne ǵylym mınıstri Erlan Saǵadıev.
Jer máselesi
QR Premer-Mınıstriniń orynbasary – Aýyl sharýashylyǵy mınıstri Asqar Myrzahmetov Úkimet otyrysynda «Qazaqstan Respýblıkasynyń keıbir zańnamalyq aktilerine jer qatynastaryn retteý máseleleri boıynsha ózgerister men tolyqtyrýlar engizý týraly» Qazaqstan Respýblıkasy Zańynyń jobasy boıynsha baıandama jasady.
Jer reformasy boıynsha Komısıanyń jer zańnamasyn jetildirý jónindegi daıyndalǵan usynystaryn zańnamalyq retteý maqsatynda Jer kodeksine kelesi normalar qarastyrylǵan ózgerister men tolyqtyrýlar engizý qarastyrylady:
1. Qazaqstandyqtarǵa aýyl sharýashylyǵy jerlerin jalǵa berý ınstıtýtyn saqtaý jáne jetildirý;
2. Qazaqstandyqtarǵa jalǵa beriletin aýyl sharýashylyǵy jerleriniń shekteý (eń joǵary) mólsherin belgileý;
3. Shekara mańyndaǵy aımaqtarda aýyl sharýashylyǵy jerlerin berýdiń talaptaryn qatańdatý;
4. Halyqtyń qajettilikterin qanaǵattandyrý úshin, eldi mekender mańyndaǵy jaıylymdardyń alańdaryn anyqtaý.
Qazaqstandyqtarǵa aýyl sharýashylyǵy jerlerin jalǵa berý ınstıtýtyn saqtaı otyryp, zań jobasymen aýyl sharýashylyǵy jerlerin konkýrstyq negizde berýdiń bólek tártibin belgileý qarastyrylady.
Konkýrsqa jarıalylyqty jáne barlyq potensıaldy qatysýshylarǵa birdeı qatysýdy qamtamasyz etý maqsatynda jańa tártip konkýrsty ótkizý týraly habarlamany BAQ, ákimdikterdiń jáne Aýyl sharýashylyǵy mınıstrliginiń resmı ınternet-resýrsterinde jarıalaý qarastyrylady.
Konkýrstyń jeńimpazyn anyqtaıtyn konkýrstyq komısıanyń quramyna qoǵamdyq keńester men uıymdardyń ókilderi qatysady, olar komısıa músheleriniń jalpy sanynyń 50 % astamyn quraıdy.
Beriletin jerlerdiń utymdy paıdalanylýyn tekserý maqsatynda, zań jobasymen turaqty monıtorıń júrgizý qarastyryldy: jalǵa alýdyń alǵashqy 5 jylynda – jyl saıyn,kelesi kezeńderde sýarmaly egistikte árbir 3 jylda, tálimdi jerde – ár 5 jylda.
Aýyl sharýashylyǵy jerleriniń úlken mólsherin «bir qolǵa» berýge jol bermeý maqsatynda, zań jobasymen qazaqstandyqtarǵa jalǵa beriletin aýyl sharýashylyǵy jerleriniń eń joǵary mólsherin alqaptar boıynsha respýblıka, oblys jáne ákimshilik aýdandar (qalalar) sheginde belgileý qarastyrylady.
Budan basqa, Zań jobasymen Memlekettik shekaranyń shekara beldeýinde jáne aımaǵynda aýyl sharýashylyǵy jerlerin berý talaptaryn kúsheıtý qarastyrylǵan, onda sheteldikterge, azamattyǵy joq adamdarǵa, sheteldik zańdy tulǵalarǵa jáne sheteldikterdiń qatysýy bar zańdy tulǵalarǵa jerdi ıelenýge shekteý qoıylady.
Aýyl turǵyndarynyń mal jaıýy úshin jaıylymdyq alqaptardyń jetispeý problemasyn sheshý úshin zań jobasymen eldi mekender mańynda turǵyndardyń jeke maldaryn ustaý boıynsha muqtajdaryn qanaǵattandyrý úshin qajetti jaıylymdardyń kólemderi anyqtalatyn bolady.
Budan basqa, zań jobasymen jer komıssısynyń statýsyn anyqtaý, jer ýchaskesiniń bólinýi, eldi meken jerlerindegi jer ýchaskeleriniń nysanaly maqsatyn aýystyrý jáne t.b. máselelerdi qamtıtyn Jer kodeksiniń normalaryn jetildirý qarastyrylady.
QR aýyl sharýashylyǵy vıse-mınıstri E. Nysanbaev 2015 jylǵy qarashada qabyldanǵan Jer kodeksiniń normalary boıynsha týyndaǵan qoǵamdyq rezonansqa qatysty Jer reformasy jónindegi komısıanyń qurylǵanyn eske saldy.
Jer komısıasy múshesi retinde arnaıy shaqyrylǵan Muhtar Taıjan Úkimet otyrysynda 26 baptyń ózgermeýin surady
«Búgingi talqyǵa salynatyn zań jobasy erekshe mańyzdy dep bilemin. Ózderińizge málim, ótken jyly bul zań barlymyzǵa aýyr tıdi. Ókinishke qaraı, keıbir azamattar qazaq halqynyń dilin, mentalıtetin túsinbeı «jerdi sataıyq» dep shyǵa keldi. Halyq oǵan qarsy bolyp, minezin kórsetti. Muny Elbasy kórip túsindi. Ol arnaıy komısıa qurdy. Qurylǵan jer komısıasy bul máseleni birneshe aı aqyldasyp, talqylap 11 sheshim qabyldady. Búgingi zań jobasy sol komısıanyń sheshimderi daıyndaldy», - dedi ol.
Aıta ketkim keletini, bul zań jobasy biz qabyldaǵan hattamaǵa 100 paıyz sáıkes keledi. Munda men kepil bere alamyn, sebebi bul jumysqa ózim qatystym. Birinshiden, moratorıı bes jylǵa uzardy. Qazir Parlament arnaıy zań qabyldap, bekitti. Jer bes jyl boıy qazaqstandyqtarǵa da, ózge memlekettiń azamattaryna da satylmaıdy. Búgingi múmkindikti paıdalana otyryp, Konstıtýsıanyń 26-babyn ózgertý usynylyp otyrǵany jaıynda aıta ketkim keledi. Menińshe, bul bapty ózgerissiz qaldyrý kerek, sebebi bul usynys kúmán týǵyzyp otyr», - dedi Muhtar Taıjan úkimet otyrysynda.
«Latıfýndıserge osy zańnyń ishinde normalar bar. Ony Erlan Nysanbaev (QR Aýyl sharýashylyǵy vıse-mınıstri – avtor) aıtyp ketti. Iaǵnı bir adamǵa nemese bir fırmaǵa beriletin jerdiń kólemine shekteý bolady. Ol óte mańyzdy. Óıtkeni, latıfýndızm degen uǵymdy joıyp tastaý kerek. Jer halyqqa tımeı aýylda jumyssyzdyq bolady. Sondyqtan biz oǵan arnaıy nazar aýdarǵanymyz jón», - dedi ol.
Sóz sońynda Premer-mınıstr Baqytjan Saǵyntaev Búgin Úkimet otyrysynda 2016 jyly qoǵamda rezonans týdyrǵan Jer kodeksi talqyǵa túsetinin aıtty. Óz sózinde, «Jer máselesi týrasynda halyqtyń muń-muqtajy qabyldandy», - dedi Saǵyntaev.
