Dımash Qudaıbergen Qytaıda ótip jatqan «I am a singer» baıqaýynyń tórtinshi kezeńinde úshinshi oryn ıelendi, dep habarlaıdy «QazAqparat» HAA-nyń Qytaıdaǵy tilshisi.
«Birinshi oryndy «Sáo Szınten Shıszy» («Lion») toby, ekinshi oryndy - Lın Ilán, úshinshi - Dımash, tórtinshi - Dý Lısha, besinshi - Chjan Sze, altynshy - Tan Szın (úshinshi kezeńde birinshi oryn alǵan bolatyn) jáne jetinshi oryndy Chjao Leı ıelendi», - dep habarlaıdy qytaılyq BAQ.
«Weibo» áleýmettik jelisindegi Dımashtyń jumys tobynyń paraqshasynda baıqaýdyń 4-kezeńindegi sýretter jarıalandy. Onda ártistiń stılısi BG Fashion, vızajısi ári shashtarazy DO Fashion ekendigi jazylǵan.
Ánshiniń kıimi - Gucci 17SS, moıynoraǵyshy - Paul Smith 17SS, shlápasy - Albertus Swanepoel, aıaq kıimi - Gucci 17SS, júzigi - H&M, bilezigi Japonıadan.
Eske salaıyq, buǵan deıin «Sınhýa» agenttigi Dımash Qudaıbergen atalmysh baıqaýdyń 4-kezeńinde qytaı tilindegi ándi aksentsiz aıtyp bergenin habarlaǵan bolatyn. Sondaı-aq Dımash eýropalyq úlgidegi pıdjak pen jibek moıynoraǵyshynda tartymdy kóringeni jazylǵan edi. Onyń boıyna kóz tartarlyq kelbetti qara tústi bas kıimi keltirip turdy.
«I am a singer» baıqaýynyń tórtinshi kezeńi 2 aqpan kúni jazylǵan edi. Ol telearnalardan 11 aqpan kúni Astana ýaqytymen saǵat 20:30-da kórsetiledi. Dımashtyń bul kezeń úshin tańdaǵan «Kúzgi muń» ánin 2013 jyly «I am a singer» baıqaýynda qytaılyq ánshi Sha Baolán oryndaǵan bolatyn.
Keshe qazaqstandyq jas talant ıesiniń anasy Svetlana Aıtbaeva onyń atalmysh baıqaý barysynda qazaq tilinde de án aıtatynyn jetkizgen bolatyn.
Aıta keteıik, Qytaı telearnasyndaǵy án baıqaýyna qatysyp jatqan otandasymyz onyń eki kezeńinde - birinshi, úshinshisinde 3-oryn alǵan bolatyn. Onyń qytaılyq áleýmettik jelidegi jazýshylar sany mıllıonnan asty, oǵan aqyndar óleń-jyrlar arnap, qyzdar qazaqsha úırenip, hattar jazýda. Jankúıerler óz paraqshalaryn Dımashtyń sýretterine toltyrýda. Tipti, Qytaı dúkenderinde otandasymyzdyń kelbeti beınelengen buıymdar, turmystyq zattar satyla bastady.
Dımashtyń ónerine tánti bolǵan álemge tanymal ánshi Lara Fabıan onymen kezdeskisi keletinin aıtty. Al kúni keshe ǵana belgili akter, kınorejısser Djekı Chan D.Qudaıbergenovti kezdesýge shaqyryp, arqa-jarqa áńgimelesken bolatyn. Dımash Qudaıbergen Qazaq ulttyq óner ýnıversıtetiniń 3-kýrs stýdenti. Keshe JOO-nyń rektory Aıman Musaqojaeva jas talant aldaǵy ýaqytta «Evrovıdenıege», odan keıin «Amerıka daýysyna» qatysatyndyǵyn aıtty.
