Senat depýtaty, Konstıtýsıalyq zańnama, sot júıesi jáne quqyq qorǵaý organdary boıynsha komıtettiń tóraǵasy Serik Aqylbaı QR Konstıtýsıasynyń 26-babyna engizilgeli jatqan ózgeriske qatysty óz oıyn jetkizdi. Bul týraly QR Parlament Senatynyń baspasóz qyzmeti habarlap otyr.
Esterińizge salaıyq, atalǵan zań jobasynda 26-baptyń baptyń 1-tarmaǵy "Árkim zańdy túrde alǵan qandaı da bolsyn múlkin jeke menshiginde ustaı alady" degen mátinde usynylyp otyr.
Serik Aqylbaıdyń túsindirýi boıynsha, "azamattar" degen sóz "árkim" sózimen almastyrylady. "Bul jerde "árqaısysy" dep Qazaqstannyń azamattary, sheteldik azamattar jáne azamattyǵy joq adamdar dep túsinýge tıispiz. Nege biz elimizdiń rezıdenti emes adamnyń nemese azamattyǵy joq adamnyń múlkiniń saqtalýyn qamtamasyz etpeýimiz kerek? Máselen, onyń kóligi, kıimi, kompúteri bar. Munyń bári sol adamnyń múlki bolyp sanalady. Odan basqa, sheteldik azamattar munda ınvestısıa ákeledi, ol da múlik. Kelgen ınvestısıa qorǵalýy kerek, ony Konstıtýsıamen saqtandyrylýyn qamtamasyz etilýi kerek", - dep atap ótti ol.
"Jer týraly másele - ol basqa mártebege ıe, múlde basqa erejemen retteledi", - dedi Serik Aqylbaı. "Biz bul jerde Konstıtýsıanyń 6-babyna júginýimiz kerek, onda jer zańda kórsetilgen jaǵdaılarda ǵana jeke menshikke beriletini jazylǵan. Iaǵnı, munda Jer týraly jáne Azamattyq kodeksterge silteme jasalǵan, al ol zańdarda sheteldikterdiń aýyl sharýashylyǵyna arnalǵan jerlerdi satyp alýy týraly birde-bir sóz joq", -dedi senator.
Onyń aıtýynsha, 26-baptyń 1-tarmaǵyna baılanysty jer týraly pikirtalastyń negizi joq, óıtkeni, jer máselesi bul erejemen qarastyrylmaıdy. "Sheteldikterdiń Qazaqstanda aýyl sharýashylyǵyna arnalǵan jerlerge ıe bolýy múmkin emes. Durys túsindirilgende, eshqandaı olqylyq bolmaý kerek. Bári de bizdiń zańdarymyzǵa sáıkes bolyp otyr. Memleket basshysy aýyl sharýashylyǵy jerleriniń sheteldikterge satylmaıtyny týraly buryn da aıtqan bolatyn. Jer, sý, tabıǵı resýrstar - olar múlik emes. Olar erekshe mártebege ıe", - dedi joǵarǵy Palatanyń salalyq komıtetiniń basshysy.
