Keshe 12 aqpan kúni Ońtústik astanamyzdyń tórinde Respýblıka saraıynda jyraý, memlekettik syılyqtyń laýreaty, kompozıtor, ánshi, Májilis depýtaty Bekbolat Tileýhannyń Táýelsizdiktiń 25 jyldyǵyna arnalǵan «Elim meniń» atty shyǵarmashylyq keshi ótti.

Qashanda qalt aıtpaıtyn qazaqtyń kórnekti aqyny Qadyr Myrza Áli Bekbolat inisi týraly: "Bekbolattyń baryna táýbe deıik! Ol bolmasa, qazaq mýzykasy qurqulaqpen aýyryp, búkil tisi saýdyrap túsip qalǵandaı eken..." dep baǵa bergen óner ıesiniń keshine halyq nyq toly jınalyp, konserttiń bastalýyn asyǵa kútti. 

Kesh qonaqtary  qatarynda Altynbek Qorazbaev, Tuńǵyshbaı Jamanqulov, Arman Qyryqbaı, Muhamedjan Tazabek syndy tanymal tulǵalar boldy.

Konsertte Bekbolat Tileýhannyń oryndaýynda jyraýlardyń jaýhar jyrlary oryndaldy. Olardyń ishinde Shalkıiz, Aqtamberdi, Dospambettiń jyryna qanyq boldy. Sondaı-aq, Abaı Qunanbaıuly men Dýlat Babataıulynyń mándi de maǵynaly jyrlary oryndalyp, dástúrli ánge shóldep qalǵan halyq rıza bolyp qaıtysty.

Sondaı-aq, konsertte baýyrlas noǵaı, qyrǵyz eliniń ónerpazdary da tóbe kórsetti. Qytaı elinen kelgen qandasymyz da jyraqtaǵy bir jarym mıllıon qazaq halqynyń atynan ystyq sálemin joldap, halyqty ánimen bir serpiltip tastady.

Keshti arnaıy tamashalaý úshin Qytaıdaǵy qazaq balýandary da keldi. Olar Qytaıda ótken jekpe-jek týrnıriniń fınalynda bir-birimen judyryqtasa almaı, jarystan shettetilgen edi. Balýandardyń bul áreketin qazaq jankúıerleri joǵary baǵalady.

Sondaı-aq, kesh qonaqtary bolǵan Dosymjan Tańatarov, Qaırat Nurtas, Ernar Aıdar, Ibragım Eskendir, Aıgerim Qalaýbaeva men "Alashuly" toby halyqqa án arnap, tyńdarmandy án áldıiniń besiginde terbedi.

Esterińizge sala keteıik, 19 qańtar kúni Astanada Bekbolat Tileýhannyń Táýelsizdiktiń 25 jyldyǵyna oraı «Elim meniń» atty konserti ótken bolatyn. 3500 adamǵa arnalǵan «Qazaqstan» ortalyq konsert zalynda adam lyq toly bolyp, ánshiligin joǵary baǵalaıtyn tyńdaýshylary dástúrli án ónerinen bastap, estradalyq ánniń jaýharlarymen sýsyndady.

Maral Shaıhy