Bilim mınıstri Erlan Saǵadıev UBT suraqtaryndaǵy Baıan Esentaeva, Nurtas Adambaev jáne Ermek Tursynovqa qatysty suraqtarǵa jaýap berdi, dep habarlaıdy Tengrinews.kz.

 "Men bul suraqty ózim kórmedim. Múmkin kórý kerek shyǵar. Al jalpy suraqtar Qazaqstannyń Olımpıada chempıondary jaıly, tanymal jazýshylar men sýretshiler, ánshiler jaıly bolady. Naǵyz testileý kezinde qandaı suraqtar bolatynyn áli talqylaımyz", - dedi mınıstr.

 Osydan keıin mınıstrge jýrnalıser Ermek Tursynovtyń osy suraqqa qatysty pikir bildirgenin habarlady. Olardyń aıtýynsha, Ermek Tursynov muny sandyraq dep ataǵan. Ol ózi týraly suraqtyń UBT-da kezdesetindeı Qazaqstannyń óner salasynda aıtarlyqtaı tulǵa emes ekenin aıtqan.

Al óz kezeginde mınıstr munyń synaq túrinde júrgizilgen test ekenin aıtty.

"Balalar osy suraqtarmen jattyǵady. Bul suraqtar gazetterden, jýrnaldardan, teledıdarlardan alynyp jatyr. Sizder Baıan Esentaeva jaıly jazasyzdar ǵoı? Ne úshin jazasyzdar? Mátinder saıttardan jáne gazetterden alynyp, stýdentterge berildi. Mine, mátindi oqyp, suraqtarǵa jaýap berińiz. Siz jazsańyz, ony biz nege almaımyz? ", - dedi mınıstr.

Sonymen qatar, mınıstr saıttaǵy materıaldardyń 20 paıyzynyń Baıan Esentaeva jaıly ekenin aıtty. "Stýdent osylaısha suraqtarǵa daıyndalady. Talapker UBT-ǵa kelgende oǵan qandaı suraqtyń keletinin bilmeıdi. Mysaly, suraqtar Vınokýrov týraly, mádenıet týraly bolýy múmkin", - dep túsindirdi Saǵadıev.

Eske sala keteıik, osyǵan deıin Ulttyq ortalyq Baıan Esentaeva jaıly suraqtyń nelikten testileýge engizilgenin túsindirgen bolatyn. Aıta keteıik, 1 qańtardan bastap jańa formatqa ózgertilgen suraq-jaýapta Baıan Esentaevamen qatar, talaı ártis-shoýmenderdiń aty atalǵan eken. Al qazaq tili men ádebıetiniń ornyn basqan "Oqý saýatylyǵy" pánin osyndaı suraqtarmen toltyrǵan Ulttyq testileý ortalyǵyndaǵylar bolsa jastardy shoýǵa tarttyq dep otyr.