ALASH – RÝH

(1917 – 2017j)

(Alash qaıratkerlerine arnalǵan as)

Bolashaqqa jetse eken izgi únim,

Muǵjıza kún júzdesippiz biz búgin.

Eske alamyz mártebesin tý etip,

Uly Alash uranynyń júz jylyn!

Alash kıe - sanamyzǵa ornaǵan,

Ol týraly toqsan márte tolǵanam.

Bir ǵasyrlyq tarıhynda Alashtyń,

Arnaıy bir as berýler bolmaǵan.

Tas tesedi móldir monshaq tamshy da,

Osynda da bir qasıet bar sirá.

Ulyqtaǵan kósemderin Alashtyń,

Rahmet, ult portaly «Qamshyǵa».

Alash rýhy úzilmeıtin uly arna,

Uly arnanyń ıeleri tur alda.

Alash rýhyn asqaqtatqan as berip,

Rahmet, sańlaq inim- Bilálǵa!

İsimizdi ilgeri etsin bir Alla!!

Qyl moıynǵa qylysh tónse qylshyldap,

Aqıqatqa tike qarap tursyn naq.

Kemel oıly ul men qyzdar ósse eken –

Ultshyl Alash rýhymenen sýsyndap.

Alash, Alash- meniń ulttyq uranym,

Alash, Alash taýsylmaıtyn jyr- ánim.

Shahıt baba arýaǵyna arnaǵan,

Qabyl bolsyn, hadıs, duǵa, quranym!

Qaırat Qulmuhammed

aqyn, QR mádenıet qaıratkeri