Natalá Morozova esimdi azamatsha ádildik surap zanoza.kg portalyna habarlasqan., málimettiń qazaqsha nusqasyn "Qamshy" portaly oqyrman nazaryna usynady.

Sokýlýk aýdanynyń 26 jastaǵy turǵyny Alekseı esimdi 6 jasar ulymen serýendeýge shyqqan. Joǵary jyldamdyqpen kelgen kólik balany qaǵyp ketken kezde anasy men balasy jolda júrip bara jatqan.

«Kólik 15 metr júrip baryp biraq toqtady. Kólik júrgizýshisi biraz adam jınalyp qalǵanyn kórgennen keıin kóliginen túsken. Túsip alyp bizge aıqaılaı bastady», - dep esine alady Natalá.

Anasy esinen tanyp qalǵan balasy ekeýin aýrýhanaǵa alyp barýyn talap etken. Alaıda, kólik júrgizýshisi klıent kólikte kútip otyr dep úzildi-kesildi bas tartqan. Belgili bolǵandaı, búldirshindi qaǵyp ketken er adam taksı júrgizýshisi bolǵan.

Degenmen, ashynǵan ana óz talabyn oryndatqyzyp, tez arada Sokýlýk aýdandyq aýrýhanasyna jetkizilgen. Alekseıge alǵashqy dárigerlik kómek kórsetip, №3 balalar aýrýhanasyna jibergen. Dárigerlerdi kútip, anasyna qandaı kómek qajet ekenin bilýge taksı júrgizýshisi umtylmaǵan.

«Ol meni jyndy dep aıyptap, óziniń kúte almaıtyndyǵyn aıtty. Namazǵa asyǵyp bara jatyr eken», - dep shaǵymdandy Natalá.

Alekseıge beli jáne jilinshigi synǵan degen dıagnoz qoıypty, bala kóp mólsherde qan joǵaltqan. Birinshi kúni-aq balaǵa ota jasaǵan, keıinnen taǵy da eki ota jasalýy qajet eken.  Oqıǵaǵa kináli Nurbek Imnaqulov balanyń em-domyn tóleýden bas tartyp otyr.

Natalányń aıtýynsha, alǵashqy eki kúni Nurbektiń aǵasy barlyq shyǵyndardy tólegen, alaıda keıinnen toqtatyp qoıypty. Kináli taksı júrgizýshisi telefon qońyraýlaryna jaýap bermeı, otbasyǵa kómek kórsetpegen.

«Balamnyń emine qarajat jetkizý úshin barlyǵymyz smartfondarymyz ben kompúterlerimizdi satyp jiberdik. Al onyń otbasy maǵan qysym kórsetip jatyr», - deıdi Morozova.

Birneshe kún buryn Nurbek Imanqulovtyń anasy men ápkesi aýrýhanaǵa kelip, balanyń apasymen  janjal shyǵarǵan eken. Áıeldiń aıtýynsha, onyń tórt balasy bar dep aryzyn qaıtaryp alýǵa úgittegen. Olarǵa jaýap retinde «Bizdiń balamyz jaǵdaıy she?» dep aıtyp, sotqa deıin jetkizýge daıyn ekendikterin aıtqan.

Sokýlýk ROVD-nyń tergeýshisi de naqty eshnárse aıtpaı otyr. Qaǵyp ketken er adamdy tutqyndap nemese onyń eshqaıda ketpeýi kerektigi jaıly úkim shyǵarýǵa asyqpaıtyn kórinedi, bul isin taksı júrgizýshisin aıyptaıtyn dálelderdiń jetkiliksiz bolýynan dep túsindiredi. Mundaı úkimdi tek balany aýrýhanadan shyǵarǵannan keıin ǵana alýǵa bolady eken. Al balany aıaǵyna ota jasaǵannan keıin baryp qana shyǵarady. Oǵan óte qymbat mólsherde platınalyq shtıft qajet eken.
Oǵan qarajatty JKO sheneýnigi tóleýi qajet eken, alaıda ol qońyraýlarǵa jaýap bermı otyr. Qysqasy sheshimi kúrdeli tuıyqtalǵan sheńber bolyp tur.

Aýdarǵan: Nazerke Labıhan