Almatyda 17 jastaǵy veloshabandoz qyz qaıtys bolǵany jaıynda habarlanǵan. Soltústik Qazaqstannan jarysqa kelip, aýrýhanadan biraq shyqqan Dana Ahmetova birneshe kún hál ústinde jatyp tilge kelmesten kóz jumǵan. Dárigerlerdiń aıtýynsha, sportshyǵa kún ótip ketken. Al boıjetkenniń týystary oǵan der kezinde kómek kórsetilmedi dep otyr.

Velosporttan Qazaqstan quramasynyń múshesi Dına Ahmetova Almatyǵa jastardyń 4-shi sporttyq oıynyna qatysý úshin kelgen. Soltústiktiń namysyn qorǵap júrgen jas talant oqý-jattyǵý barysynda esinen tanyp qulapty. Dereý jedel járdemmen birden aýrýhanaǵa jetkizilgen. Alaıda, birneshe kún hál ústinde jatyp, aqyry tilge kelmesten kóz jumdy.

№7 qalalyq aýrýhananyń bas dárigeri Marat Abdýllaevtyń aıtýynsha, organızmniń sýsyzdanýy saldarynan bala qıyn jaǵdaıǵa kelgen. Odan keıin baýyry, búırekteri, basqa organdary zaqym alǵan. Barlyq mamandar jınap konsılıým ótkizgen, alaıda bes kúnnen keıin bala qaıtys bolyp ketti. Bul týraly KTK jańalyqtar qyzmeti habarlaıdy.

Mamandar sportshyǵa kún ótken dep otyr. Aǵzasyndaǵy sýy azaıyp, keı músheleri jumysyn toqtatqan. Alaıda Dınanyń týystary bul pikirmen kelispeıdi. Olar qaıǵyly jaǵdaı jarysty uıymdastyrýshylardyń salǵyrttyǵynan boldy degen pikirde. Sebebi, qyz esinen tanyp qulaǵanda oǵan alǵashqy kómek kórsetilmepti.

Qaıǵydan qan jutyp otyrǵan Dananyń ákesi Janbolat Ahmetov bylaı deıdi:

-Onyń densaýlyǵy óte jaqsy bolǵan. Ózi ulttyq quramanyń múshesi ǵoı. Myqty edi. Jattyqtyrýshysy odan álem chempıonyn shyǵaram deıtin. Biraq ókinishke qaraı ol arman oryndalmady.

On tórt jasynda sportqa kelip úsh jylda biraz belesti baǵyndyrǵan Dına Ahmetovaǵa bapkerleri rasymen de úlken úmit artqan eken. Ol 2016 jyldan bastap olımpıadalyq daıarlaý tizimine kirgizilgen. Qazir qyzdyń denesine saraptama júrgizilip jatyr. Keıin ony jerleý úshin týǵan óńiri Qyzyljarǵa alyp ketedi.