Jeti han jerlengen ejelgi Saraıshyq qalasynyń ornynan Stalınniń ómiri baıandalǵan kitap tabyldy dep habarlaıdy Qamshy aqparattyq agenttigi jergilikti jýrnalıs Nurgúl Ysmaǵulova «Han ordaly Saraıshyq» memorıaldy kesheniniń dırektory Moldash Berdimuratovqa silteme jasap.

Qyzyl tústi qalyń kitap kıizge oralǵan kúıi topyraqtyń astynan shyqqan. 1949 jyly Máskeý baspasynan taralǵan kitaptyń birde-bir beti sarǵaımaı, sol kúıinde saqtalypty. Kitaptyń avtorynyń kim ekeni kórsetilmegen.

Aqsaqal týyndynyń nelikten bulaı jasyrylǵanyn tap basyp aıtý qıyn ekenin jetkizdi:

«1953 jyldan keıin qarapaıym halyq sol kezdegi saıası ahýalǵa, qýǵyn-súrginge baılanysty kúdik týdyrmas úshin kómip tastaǵan bolýy kerek. Bolmasa, onyń balalyq shaǵynan bastap baıandalǵan jazbany janashyrlyqpen jasyrǵan bolýy múmkin» , – deıdi ol.

Aıta ketelik, qazirgi tańda Jaıyq sýy shaıyp bara jatqan qalany saqtap qalý úshin ózenniń jaǵasy bekitilip jatyr. Buǵan deıin Atyraý oblysynyń ákimi Nurlan Noǵaev bul jobaǵa 1,5 mıllıard teńge bólingenin málimdedi. Jumys 2018 jyly aıaqtalýy tıis. Sonymen qatar, bıyl Mádenıet jáne sport mınıstrligi Saraıshyqty qalpyna keltirý úshin 100 mıllıon teńge bóletinin habarlady. Shahardyń ornyn týrısik ortalyqqa aınaldyrý josparlanǵan.

Kóne qalanyń orny Atyraý qalasynan 45 shaqyrym jerde Jaıyq ózeniniń jaǵasynda ornalasqan. Altyn ordanyń saıası, ekonomıkalyq ortalyqtarynyń biri bolǵan qala Qasym hannyń tusynda Qazaq handyǵynyń astanasy atandy. Jibek jolynyń boıynda turǵan munda 7 han jerlengen. Olar: Móńke, Toqtaǵý, Jánibek, Ámir Oqas, Qasym han, Shıh Mamaı jáne Júsip handar.