QR Syrtqy ister mınıstri Qaırat Ábdirahmanov Sırıa boıynsha Astana prosesi aıasyndaǵy joǵary deńgeıdegi 5-shi halyqaralyq kezdesýdiń qorytysyndyn shyǵardy, dep habarlaıdy Qamshy aqparattyq agenttigi QazAqparatqa silteme jasap.
«Osy jyldyń basynda Memleket basshysy Nursultan Nazarbaevtyń qoldaýymen jáne tikeleı qatysýmen bastalǵan proses úlken jetistikke jetti. Astanada ótken kezdesýlerdiń nátıjesinde Sırıadaǵy zorlyq-zombylyq aıtarlyqtaı tómendedi. Halyqtyń beıbit ómirin qalpyna keltirý úshin kóptegen is atqaryldy. Oǵan Sırıadaǵy soǵys is-qımyldaryn toqtatý rejiminiń kepilger elderiniń kúsh-jigerimen qatar, Sırıa Úkimeti men qarýly opozısıanyń janjaldy beıbit jolmen sheshýge umytylysy, sonymen qatar BUU tarabynan udaıy qoldaý septigin tıgizdi. Qazaqstan kelissózderge óz alańyn usyna otyryp, Sırıa halqynyń qaıǵy-qasiretin jeńildetýge jáne olardyń beıbit ómirge oralý umtylysyna kómek kórsetý arqyly zor úles qosty. Osyǵan baılanysty elimiz halyqaralyq qaýipsizdik pen turaqtylyqty nyǵaıtýǵa baǵyttalǵan kúsh-jigerge járdem kórsetýin jalǵastyra beredi. Bizdiń elimizdiń saıasaty búkil álemdegi dıalogty, ózara túsinistik pen beıbitshiliktiń turaqtylyǵyn nyǵaıtýǵa baǵyttalǵan. Osyǵan oraı Qazaqstan atalǵan daǵdarysty saıası retteýge qol jetkizý úshin beıbit saıasatyn jalǵastyra beredi. Múddeli taraptar arasyndaǵy kelissózder úshin tuǵyrnama usynatyn bolady», - dedi Qaırat Ábdirahmanov.
Onyń aıtýynsha, Sırıa boıynsha Astana prosesi aıasyndaǵy búgingi joǵary deńgeıdegi 5-shi halyqaralyq kezdesý Sırıadaǵy soǵysty toqtatý rejimin nyǵaıtýǵa baǵyttalǵan oń nátıjelermen aıaqtaldy. Kóptegen másele talqylanyp, taraptar arasynda naqty ýaǵdalastyqtarǵa qol jetkizildi jáne aldaǵy ýaqyttaǵy kelissózderdiń jospary qaraldy.
«Biz sırıalyq janjaldyń áskerı sheshimi joq ekendigine árkez sendik. Sondyqtan dıalog - bul beıbitshiliktiń jalǵyz joly ǵana. Áskerı sheshim sırıa halqyna munan da zor qasiret ákelip, óńirlik jáne halyqaralyq taraptar arasyndaǵy jańa qarama-qaıshylyqtardy týyndatady», - dedi Qazaqstan Syrtqy ister mınıstri.
Sonymen qatar ol búgin Astana prosesine qatysýshylar Sırıa jerinde beıbitshilik pen turaqtylyq ornatýǵa taǵy da bir mańyzdy qadam jasaǵandyǵyn basa aıtty.
