Orta salmaqta WBA (Super), IBO, WBC jáne IBF tujyrymdary boıynsha álem chempıony qazaqstandyq boksshy Gennadıı Golovkın (37-0, 33 KO) meksıkalyq Saýl "Kanelo" Alvarespen (49-1-1, 34 KO) ótetin jekpe-jekke daıyndyq jattyǵýlaryn bastady, - dep habarlaıdy Qamshy aqparattyq agenttigi Vesti.kz saıtyna silteme jasap. Bul týraly onyń bapkeri Abel Sanches málimdedi. Jattyǵý prosesi ádettegideı Kalıfornıadaǵy Big Bear kesheninde ótedi.

"Erteń ol jattyǵý lagerine keledi. Biz jattyǵýlardy bastaımyz. Men onyń myqty bolýy úshin jattyǵýlarǵa bar kúshin salatynyna senemin. Qarsylas ta osy máseleni eskerýi tıis. Bizde "Kanelony" sońǵy raýndtarda qulatýǵa nemese tóreshiler sheshimimen jeńiske jetemiz degen úmit bar", - dep jazdy boxingnews24.com Sanchesti sózin.

Aıta keteıik, Golovkın - "Kanelo"  jekpe-jegi 16 qyrkúıek kúni Las-Vegasta (AQSH, Nevada) T-Mobile Arena arenasynda ótedi, eki boksshy arasyndaǵy jekpe-jek ótetini resmı túrde jarıalandy.

Saýl Kanelo Alvareske qarsy jekpe-jekte Gennadıı Golovkın orta salmaqta WBC, WBA (Super), IBF jáne IBO chempıondyq ataqtaryn qorǵaıdy. Meksıkalyq "The Ring" jýrnalynyń belbeýin báske tigedi.