QR ulttyq ekonomıka mınıstri Tımýr Súleımenov áleýmettik mańyzy bar azyq-túlik taýarlarynyń baǵalaryna qatysty jaǵdaı týraly baıandady, dep habarlaıdy Qamshy aqparattyq agenttigi premer-mınıstrdiń saıtyna silteme jasap.

«Jasalǵan memorandýmdar aıasyndaǵy mınıstrlikter men ákimdikterdiń birlesken jumysy áleýmettik mańyzy bar azyq-túlik taýarlaryna tutynýshylyq baǵalar ındeksiniń ósý qarqynyn qańtar-naýryzdaǵy 1,2 %-dan sáýir men mamyr aılarynda 0,6% jáne 0,9%-ǵa deıin tómendetýge múmkindik berdi. Sonymen qatar, maýsymda tutynýshylyq baǵalar ındeksiniń 1,9%-ǵa deıin artqany baıqalýda», - dep atap ótti T. Súleımenov.

Óz kezeginde, QR aýyl sharýashylyǵy birinshi vıse-mınıstri Qaırat Aıtýǵanov turaqtandyrý qorlarynyń jumysy týraly baıandady. Ákimdiktermen áleýmettik mańyzy bar azyq-túlik taýarlary baǵalarynyń ósýine jol bermeý boıynsha memorandýmdar jasaldy.

Qaraǵandy, Batys Qazaqstan oblystarynyń jáne Astana qalasynyń ákimderi E. Qoshanov, A. Kólginov jáne Á. Isekeshev óńirlerdegi jaǵdaı týraly baıandama jasady.

Otyrys barysynda QR Premer-Mınıstriniń orynbasary Asqar Myrzahmetov ákimdikterde áleýmettik mańyzy bar ónimderdiń baǵalaryn turaqtandyrý úshin barlyq múmkindikter baryn atap ótti. Óńirlerge turaqtandyrý qorlaryna jańa túsim ónimderin satyp alýǵa kirisý kerek.

Otyrys máselelerin qaraýdy qorytyndylaı kele, QR Premer-Mınıstri Baqytjan Saǵyntaev ákimdikterge áleýmettik mańyzy bar azyq-túlik taýarlarynyń baǵalaryn turaqtandyrý boıynsha jumysty kúsheıtýdi tapsyrdy.

QR ulttyq ekonomıka jáne aýyl sharýashylyǵy mınıstrlikterine baǵalar serpinine turaqty monıtorıń júrgizýdi qamtamasyz etý tapsyryldy.

Memlekettik organdarǵa ákimdiktermen birge basym túrde óńirlik bazarlardy azyq-túlikpen molyqtyrý jáne saýda ınfraqurylymyn damytý boıynsha sharalar qabyldaý qajet.