Qazaqstanda Memleket basshysynyń tapsyrmasymen «Ýaqyp» korporatıvti qaıyrymdylyq qory quryldy. Qor ártúrli áleýmettik jobalardy qoldaýdy júzege asyrady. Bul týraly Qazaqstan Respýblıkasy Úkimetiniń otyrysynda QR Din isteri jáne azamattyq qoǵam mınıstri Nurlan Ermekbaev aıtty dep habarlaıdy Qamshy aqparattyq agenttigi.

Mınıstrdiń aıtýynsha, «Ýaqyp» qory Qazaqstan Respýblıkasy Prezıdentiniń tapsyrmasymen quryldy. Onyń qyzmeti komersıalyq emes qaıyrymdylyq uıym retinde áleýmettik jobalardy qarjylandyrýǵa, bilim-aǵartýshylyq sharalardy júrgizýge, sonymen qatar, dinı birlestik qyzmetkerlerleri jumysynyń tıimdiligin kóterý jáne dinı mekemelerdiń qyzmetin qoldaýǵa baǵyttalady. «Ýaqyp» qorynyń prezıdenti bolyp Qaırat Aıtbaı saılandy.

Qordyń quryltaıshylary QR Din isteri jáne azamattyq qoǵam mınıstrliginiń Halyqaralyq dinder jáne mádenıetter ortalyǵy jáne Din máseleleri jóninde taldaý jáne ǵylymı-zertteý ortalyǵy bolyp tabylady.

Qamqorshylar keńes quramyna QR Din isteri jáne azamattyq qoǵam mınıstri, Parlament depýtattary, Joǵary mýftıı, «Dintanýshylar kongresiniń» tóraǵasy, Qarjy mınıstrliginiń, Memlekettik qyzmet isteri jáne sybaılas jemqorlyqqa qarsy is-qımyl agenttiginiń, «Atameken» kásipkerler palatasynyń, «Astana» halyqaralyq qarjy ortalyǵynyń ókilderi jáne belgili qoǵam qaıratkerleri endi.

Qamqorshylyq keńestiń tóraǵasy din salasyndaǵy ýákiletti organnyń birinshi basshysy bolyp sanalady.

Aıta keteıik, qamqorshylyq keńes quramy qor jumysynyń ashyqtyǵyn jáne qarjynyń maqsatty jumsalýyn qamtamasyz etedi. Qordy qurý barysynda Katar, Kýveıt, Iordanıa, Egıpet, Indonezıa, Túrkıa, Belgıa, Reseı sıaqty elderdiń tájirıbeleri jan-jaqty zertteldi.

Qordyń aldynda turǵan mindetterdiń mańyzdylyǵy men ózektiligin eskere otyryp, QR Din isteri jáne azamattyq qoǵam mınıstri atalǵan jobany jan-jaqty qoldaýǵa shaqyrdy.

«Ýaqyp» qorynyń qyzmeti kelesi mindetterdi sheshýge baǵyttalǵan:

• eldegi beıbitshilik pen turaqtylyqty qamtamasyz etýge úles qosý;
• turǵyndardyń áleýmettik az qamtylǵan toby men múmkindigi shekteýli azamattarǵa kómek kórsetý;
• balalar men jastardyń fızıkalyq jáne ıntellektýaldyq damýyn qoldaý;
• dinı radıkalızm men ekstremızmniń aldyn-alý;
• mamandardyń biliktiligin kóterý jáne shalǵaıda ornalasqan dinı birlestikterdiń áleýmettik máselelerin sheshý.

Osy atalǵan mindetterdi sheshýge saýapty is jasaýǵa nıet bildirgen eldiń barlyq azamattary, Qazaqstannyń komersıalyq jáne komersıalyq emes uıymdary, sondaı-aq, sheteldik jáne halyqaralyq uıymdar shaqyrylady.

«Ýaqyp» qorynyń ókilderi azamattar qaıyrymdylyq qoldaýdy qarjylaı, jyljymaly jáne jyljymaıtyn múlik túrinde kórsete alatyndyǵyn atady.