Shetelge turaqty ómir súrýge ketetin halyq sany kóbeıip barady. Bul týraly Qamshy aqparattyq agenttigi Azattyqqa silteme jasap habarlaıdy.
Áleýmettik-demografıalyq statısıka basqarmasynyń sarapshysy Gúljıhan Aıǵozınanyń aıtýynsha, qonys aýdarýshylardyń kóbi Reseı, Germanıa jáne Belarýske turaqtanady. Sarapshy Soltústik Qazaqstan oblysynan ózge elge qonys aýdarýshy azamattardyń sany oblysqa kóship keletinder sanynan kóp deıdi.
- 2016 jyly oblysqa 743 adam kóship keldi. Al ketkender sany 3 myń 276. Petropavl qalasyna 476 azamat kóship kelip, 1798 adam ketip qalǵan. 2016 jyly shetelge kóshkenderdiń kóbi Reseı, Germanıa jáne Belarýske ketti, - dedi Gúljıhan Aıgozına.
Statısıka mamandarynyń deregine sáıkes, respýblıka aýmaǵyndaǵy kóshi-qon boıynsha Soltústik Qazaqstan oblysy turǵyndary qonys aýdaratyn qalalardyń ishinde Astana qalasy birinshi orynda tur. Keıingi orynda Aqmola oblysy, Qaraǵandy jáne Qostanaı qalalary tur.
Ótken jyly Qazaqstannan 26 myń 747 adam, onyń ishinde Soltústik Qazaqstan oblysynan 2 myń 555 azamat ózge eldiń azamattyǵyn alǵan. 2017 jyldyń birinshi jartysynda Qazaqstannan 4 myń 423 adam (onyń 461-i Soltústik Qazaqstan oblysynan) shetelderge qonys aýdarǵan.
Sholýshy: Aıgerim Taýbaı
