Alashorda kósemderiniń biri Jahansha Dosmuhamedovtiń Máskeýdegi Býtovo polıgonynda jerlengeni belgili boldy, dep jazady Qamshy aqparat agenttigi.
QazAqparattyń málimetine súıensek, bul týraly Alashorda qozǵalysynyń 100 jyldyǵyna oraı Jympıty-Máskeý baǵytynda uıymdastyrylǵan ekspedısıa múshesi, Batys Qazaqstan ınovasıalyq-tehnologıalyq ýnıversıtetiniń profesory, tarıh ǵylymdarynyń kandıdaty Dámetken Súleımenova málim etti.
Onyń aıtýynsha, Býtovo buryn qalanyń shetinde bolsa, qazir Máskeýdiń ishinde qalǵan. Munda alty úlken qorymda saıası qýǵyn-súrgin jyldary jazyqsyz atylǵan 20761 adam jerlengen. Osyndaǵy ǵıbadathananyń basshysy Kırıll Kaleda ákeı Reseı úkimetiniń qoldaýymen 1997 jyldan beri tynbaı eńbektenip, Býtovo polıgonynda jerlengen myńnan astam saıası qýǵyn-súrgin qurbandarynyń aty-jónin anyqtap, birneshe kitap shyǵarǵan. Sonyń 3-tomynyń 82-betinde J.Dosmuhamedov týraly da málimet berilgen. Iaǵnı 1938 jyly 3 tamyz kúni atylǵan 120 adamnyń ishinde Jahansha da bar. Býtovodaǵy qyrǵyn 1937 jyly 8 tamyzda bastalyp, 1938 jyldyń qarashasyna deıin jalǵasqan. Máıitterdi qalaı bolsa solaı kóme bergen. Mysaly, 12 sharshy metrdiń jerdiń ózinen 149 adamnyń súıegi shyqqan.
«Qazirgi kezde Býtovo polıgonyndaǵy mármár taqtaǵa osynda qurban bolǵandardyń aty-jónderi jazylýda. Osy mármár taqtada Jahansha Dosmuhamedovtiń aty-jóni, atylǵan kúni tolyqtaı jazylǵan. Olar Jahanshanyń kim ekenin bilmese de, tizimge kirgizgen. Býtovodaǵy qorymǵa elden aparǵan bir ýys topyraqty saldyq. Bir ýys topyraqty alyp keldik. Máskeý saparynda sondaı-aq 1906-1910 jyldary Jahansha bilim alyp, zańger mamandyǵyn alyp shyqqan ǵımaratta (qazir munda M.Lomonosov atyndaǵy MMÝ-dyń fılıaly Azıa jáne Afrıka elderi ınstıtýty ornalasqan), Dosmuhamedovter otbasy turǵan úıde, Alashorda kósemi Álıhan Bókeıhanov jerlengen Don zıratynda boldyq. Alǵan áserimiz mol, keıinirek tolyq jazatyn bolamyz», - dedi alashtanýshy Dámetken Súleımenova.
