EKSPO-2017 halyqaralyq kórmesi bastalǵaly beri túrli daý-damaılar men ár túrli mazmundaǵy pikirler jıilep ketkeni ras. Ondaǵy qyzyqtar men olqylyqtar, sonymen qatar jetistikter jaıynda kózimen kórgen adamdardyń barlyǵy da jarysa jazýda. Al myna jaǵdaı, tipti, elde bolmaǵan oqıǵa boldy.

EKSPO kórmesi ótip jatqan aımaqqa kez kelgen adam arnaıy akredıtasıadan ótip, kýálik jasatýy qajet. Bul – kez kelgen aýqymdy is-sharada qalyptasqan úrdis. Al, janýarlar she?.. EKSPO kórmesine endi janýarlar da arnaıy kýálik jasatyp kirýi qajet eken. Oǵan Aıgúl Ibraeva esimdi jeli qoldanýshysynyń jazǵan jazbasy dálel bola alady.

«Astanadaǵy EKSPO kórmesinde ótetin shoýǵa 4 túıe ákelingen bolatyn. Alaıda, EKSPO aımaǵyna ótý úshin akredıtasıadan ótip, arnaıy kýálik jasatý qajet eken. Olaı bolmaǵan jaǵdaıda esikte turǵan kúzetshi kirgizbeı qoıady. Akredıtasıa bolmasa ol túıe me, álde basqa ma – qyzyqtyrmaıdy eken, eń bastysy akredıtasıa bolý kerek.

Keıinnen akredıtasıa jasaıtyn ortalyqqa habarlasyp kórip edik, bir qyz «Akredıtasıadan ótý úshin kózildiriksiz 3h4 sýret, anfas jáne de ártistiń tolyq aty-jóni qajet» - dep jaýap berdi. Sýretti kórip ary qaraı ne bolǵandyǵy belgili shyǵar... Alaıda, azdap qýlyq jasadyq, bir túıeni ǵana sýretke túsirip alyp, barlyǵyna sol sýretti jabystyrdyq», - dep jazady oqıǵa kýágeri Aıgúl Ibraeva óziniń jeke paraqshasynda.