EKSPO-daǵy ótkizý pýnkterinde ornatylǵan beınebaqylaý kameralary men adam sanyn esepteýish quraldar «Astana EKSPO-2017» kórmesiniń mıllıonynshy kelýshisin tirkedi, dep habarlaıdy Qamshy aqparattyq agenttigi. Ol - Astana qalasynyń 27 jastaǵy turǵyny Gúljıhan Janabergenova bolyp shyqty. Gúljıhan kórmege jalǵyz kelmeı, joldasy men úsh jastaǵy qyzyn ertip kelgen eken.
«Men №76 mektep-lıseıinde muǵalim bolyp qyzmet etemin. Munda ekinshi ret kelip turmyn, biraq ol kezde bizdiń «Nur Álem» pavılonyna kire almaǵan edim. Sondyqtan, bul joly, birinshi kezekte, biz óz elimizdiń pavılonyna at basyn burmaqpyz. Shynymdy aıtsam, osyndaı qýanyshqa tap bolamyn dep oılamadym, tipti EKSPO-ǵa kelgen adamdar sany tirkelip otyratynyn da bilmeppin», - dedi Gúljıhan Jańabergenova.
Sondaı-aq, aıy ońynan týǵan meımandy quttyqtaý úshin kórmeniń medıa-ortalyǵyna «Astana EKSPO-2017» UQ» AQ Basqarma Tóraǵasy Ahmetjan Esimov te keldi. Ulttyq kompanıanyń basshysy mıllıonynshy kelýshimen júzdesip, oǵan estelik syılyqtar men kórmege jáne Sırk dú Soleı qoıylymyna arnalǵan bıletterdi tartý etti. Ahmetjan Esimov óz quttyqtaý sózinde halyqtyń kórmege degen qyzyǵýshylyǵy kún sanap artyp kele jatqanyn taǵy bir márte atap ótti.
«Biz jospar boıynsha jumys istep kele jatyrmyz jáne barlyǵy oıdaǵydaı ótkizilýde. Búginde mıllıonynshy kelýshi tirkeldi, bul biz úshin jaqsy kórsetkish. Negizi EKSPO-2017 kórmesiniń jumysy barysynda 2 mln. kelýshi tirkeledi dep josparlaǵan edik. Degenmen, bir aı ǵana ótti, biz osy ýaqyt ishinde mıllıonynshy kelýshini qarsy alýdamyz. Osyndaı aýqymdy joba ótkizip otyrǵan soń, birinshi kezekte, kórme qazaqstandyqtardyń kóńilinen shyǵyp jatyr ma dep alańdaımyz. Kórmege eldiń qyzyǵýshylyǵy artyp kele jatqanyna qýanyshtymyz»,-dep atap ótti Ahmetjan Esimov.
Esterińizge sala keteıik, kórmeniń tirkeý qujattamasynda EKSPO-2017 kórmesine 2 mıllıon adam keledi jáne kórme nysandarynda jalpy sany 5 mıllıonǵa jýyq kelýshi tirkeledi dep josparlanǵan edi. Al, halyqaralyq pavılondardy aralaǵan kelýshilerdiń sanyn qossaq, 10 shildedegi kórsetkishke sáıkes, 5 960 212 adam tirkelgen. Kórme keshenindegi negizgi nysandarǵa jurtshylyq 834 579 ret kelgen. Bul rette 303 007 adam tamashalaǵan «Nur Álem» pavılony kósh bastap tur. Eseptep kórsek, barlyq kelýshilerdiń shamamen130 myńy nemese 14 paıyzy sheteldik qonaqtar.
Bir aı ishinde kórmeni 160 myń adam jeńildikter qarastyrylǵan tarıfpen tamashalaǵan. Olar – mektep oqýshylary, zeınetkerler men stýdentter. Sondaı-aq, 6 jasqa deıingi búldirshinder, UOS qatysýshylary men olarǵa teńelgen tulǵalar jáne múmkindigi shekteýli jandar.
Aıta keteıik, kórme aýmaǵynda osy ýaqyt ishinde 1031 mádenı jáne iskerlik shara ótkizilgen, sondaı-aq, memleket basshylarynyń, mınıstrler men halyqaralyq pavılon komısarlarynyń qatysýymen 84 hattamalyq shara uıymdastyrylǵan.
