Halyqaralyq EKSPO-2017 mamandandyrylǵan kórmesiniń mıllıonynshy kelýshisi anyqtaldy, dep jazady Qamshy aqparat agenttigi. Ol Astana mektebiniń matematıka pániniń muǵalimi Gúljıhan Jańabergenova boldy.
«Astana EKSPO-2017» UK» AQ tóraǵasy Ahmetjan Esimov mıllıonynshy qonaqty quttyqtady. Ol qonaqqa EKSPO-2017-ge kiretin kóp rettik abonomentter, dú Soleı sırkine bıletter, planshet, portatıvtik zarádtaý qurylǵysyn jáne kórme sımvoly beınelengen eskertkish kádesyılardy tartý etti. Bul týraly QR Premer-mınıstriniń resmı saıtynda habarlandy.
«Biz kórmeni ótkizý kezinde barlyǵy eki mıllıon kelýshi bolady dep josparlaǵan edik, biraq kórip otyrsyzdar, 31 kúnniń ishinde bizde mıllıon qonaq boldy. Qazir biz belsendiliktiń joǵary deńgeıin baıqap júrmiz, ótken jumada bir kúnniń ishinde 66 myń kelýshi boldy – bul óte jaqsy kórsetkish. Biz alǵa qoıǵan jospar boıynsha júrip kelemiz jáne jasyratyny joq, búgingi mıllıonynshy kelýshi bizdi qýantty», - dedi A. Esimov.
G. Jańabergenova kórmege joldasymen jáne úsh jasar qyzymen kelgen:
«Men Astananyń №76 mektebinde matematıka pániniń muǵalimi bolyp jumys isteımin. Munda ekinshi ret kelip turmyn, alǵashynda basty jattyǵý kezinde jumys ujymymmen keldim, biraq ol kezde «Nur-Álem» sferasyna bara almadym. Búgin otbasymmen keldim, osylaı bolaryn kútken de joqpyn», - dedi Astananyń baqytty turǵyny.
Málim bolǵandaı, Halyqaralyq «Astana EKSPO-2017» mamandandyrylǵan kórmesine 100-den astam el men shamamen 10 halyqaralyq uıym qatysyp jatyr.
Uıymdastyrýshylar EKSPO-2017-ge 2 mln adam keledi dep, al jalpy kelý sany shamamen 5 mln bolady dep kútýde. Kelýshilerdiń 85% qazaqstandyqtar, al qalǵan 15% shet memleketterdiń azamattary bolady dep kózdelgen. AQSH, Eýropa, Túrkıa, Qytaı jáne TMD elderinen keletin týrıserdiń sany basym bolady dep kútilýde.
10 shildedegi jaǵdaı boıynsha, halyqaralyq pavılondardy aralaýdyń jıyntyq sany - 5 960 212 qurady. Kórme kesheniniń negizgi nysandaryna adamdar 834 579 ret barǵan. Osy kúnge deıin adamdardyń eń kóp barǵan nysany – «Nur Álem», oǵan 303 007 adam barǵan. Boljaldy esep boıynsha sheteldik kelýshilerdiń sany 130 myńnan joǵary nemese shamamen 14% quraıdy.
Sholýshy: Gúlim Jaqan
