Ulttyq biryńǵaı testileýden qulap, oqýǵa túse almaı qalǵan túlekterge tegin bilim berý tetigi qarastyryldy. Bul týraly OKQ brıfıńi barysynda QR Eńbek jáne halyqty áleýmettik qorǵaý vıse-mınıstri Birjan Nurymbetov aıtty, dep habarlaıdy Qamshy.kz aqparat agenttigi Baq.kz saıtyna silteme jasap.
«Eger sońǵy jyldardy saraptap qaraıtyn bolsaq, jyl saıyn Ulttyq biryńǵaı testileýden óte almaı, oqýǵa túspeı qalǵan mektep túlekteriniń sany orta eseppen 20 myńdy quraıdy. Sondyqtan bıylǵy jyly osy balalardy tehnıkalyq kásiptik bilim berý oryndaryna memlekettiń esebinen tegin oqýǵa joldaımyz», - dedi Nurymbetov.
Vıse-mınıstrdiń aıtýynsha, qazirgi tańda 361 tehnıkalyq kásiptik bilim berý oryndary olardy qabyldaýǵa daıyn. Birinshi qyrkúıekten bastap balalardyń barlyǵy oqýǵa barady, qazir olardyń tizimi daıarlanyp jatyr.
«Oqýyn baǵdarlama (Nátıjeli jumyspen qamtýdy jáne jappaı kásipkerlikti damytý baǵdarlamasy - agent.) esebinen tóleımiz, shákirtaqysy tólenedi. Sondaı-aq, bir mezgildik ystyq tamaqpen qamtylady», - dedi vıse-mınıstr.
Onyń aıtýynsha, bilimi joq jumyssyz júrgen eresek azamattar 1-6 aılyq qysqa merzimdi kýrstarǵa tartylady. 1 shildedegi jaǵdaı boıynsha, 21 myń 127 adam qysqa merzimdik kýrstarǵa tartyldy, bitirgenderdi jumyspen qamtý jaǵy da qarastyrylǵan.
«Adamnyń jumysqa ornalasýyna basty kedergi - bilimniń bolmaýy. Resmı kórsetkishke kelsek, elimizde 9 mln-ǵa jýyq eńbekke qabiletti, ekonomıkalyq belsendi adam bar. Sonyń 27-28 paıyzy, ókinishke oraı mekteptegi orta bilimmen shektelgen. Al óz betinshe jumyspen qamtylǵandardyń jartysy, jumyssyzdardyń 25 paıyzy mekteptegi orta bilimmen qalǵan. Sondyqtan, halyqty jappaı oqytýdy maqsat etip otyrmyz», - deıdi Nurymbetov.
Vıse-mınıstrdiń aıtýynsha, burynǵy jyldary «Jol kartasy» boıynsha jylyna 6-7 myń adam oqytylsa, jańa baǵdarlama (Nátıjeli jumyspen qamtýdy jáne jappaı kásipkerlikti damytý baǵdarlamasy - agent.) boıynsha bıylǵy jyldyń ózinde barlyǵy 90-100 myń adamdy (túlekter men eresekter - agent.) oqytý kózdelip otyr.
Aıta keteıik, biz buǵan deıin bıylǵy oqý jylynan bastap jastar kolejge emtıhansyz qabyldanatyny jaıly habarlaǵan edik.
