Petropavlda qant baǵasy 30 teńgege qymbattady dep habarlaıdy Qamshy.kz aqparat agenttigi 24.kz-ke silteme jasaı otyryp. Osyǵan deıin kelisi 220-230 teńgege satylǵan shekerdiń quny qazir keı saýda oryndarynda 270 teńgege deıin artqan. Jaýapty mamandar munyń óndirýshilerdiń maýsymdyq baǵany kóterýimen baılanysty ekenin aıtyp otyr.
Petropavl turǵyny Galına Ivanova dúkendegi qant baǵasynyń ózgergenin kórip, eki oıda qaldy. Galına Ivanova, qala turǵyny: – Sońǵy ret shekerdi qysta 198 teńgeden satyp alǵan edim. Qymbattap ketipti. Joldasym ekeýimizge jylyna bir qap qumsheker qajet. Amal joq, búgin bolmasa, erteń kelip alamyn.
Elimizde jemis-jıdek pisip, naǵyz tosap qaınatatyn shaq qazir. Osyǵan baılanysty qanttyń baǵasy da ósip otyr. Máselen, Petropavlda qumshekerdiń quny ár jerde ártúrli. Tipti 250 teńgeden bastalyp, 300-ge deıin jetedi. Al jergilikti ákimdiktegiler bolsa baǵany negizsiz kótergenderdi jaýapqa tartamyz dep otyr. Bıyl soltústikte tátti ónim tapshylyǵy bolmaıdy. Ol úshin óńirge 13 vagon qant jetkizilmek. Sáıkesinshe baǵa keler aptadan bastap turaqtalady.
Murat Nurqanov, oblystyq kásipkerlik jáne týrızm basqarmasynyń bólim jetekshisi: – Almaty qalasynda JSHS bar. Sol bizdiń oblysqa negizgi jetkizýshi bolyp tabylady. Ondaǵy jiberý baǵasy qymbattaǵannan bizdiń oblysta da qymbattap otyr.
Onyń baǵasyn turaqtandyrý úshin bizdiń oblysta turaqtandyrý qory qalyptasqan. Oǵan ótken jyly 884 tonna qant kontraktilengen. Sonyń 340 tonnasy oblysqa ákelingen. Tarazda qant baǵasy baqylaýda Al Tarazda qanttyń kelisi naryqta 280-300 teńge. Komýnaldyq dúkenderde 240 shamasynda. Óńirde baǵa turaqtylyǵyn qamtý úshin ákimdik janynan qurylǵan arnaıy qor jumys istep tur. Myń tonnadan astam qant saqtaýly.
Shámsát Isabekov, «Taraz» áleýmettik kásipkerlik korporasıasynyń basshysy: – Bizdiń turaqtandyrý qorymyzda 10 pavılonymyz bar, bir komýnaldyq bazarymyz bar. Sol bazarda satylady. Taǵy dúkenderimiz bar. Sol arqyly jiberip, solar satyp jatyr. Qant qorda bar. Dúkende bar. Qyzylorda bazarlarynda qanttyń kelisi 260 teńgeden. Al qaptap alsa, ár kelisi 248 teńgege mańaıynda. «Bir aı buryn baǵa kóterilgen», – deıdi turǵyndar.
Qazir ónim jetkilikti. Turaqtandyrý qory arqyly tıisti sharalar qabyldandy. Almaty oblysyndaǵy qant zaýytynda jóndeý júrip jatyr Búginde Almaty oblysynda qant shyǵaratyn eki kásiporyn bar. Onyń alǵashqysy josparly jóndeý jumystaryna jabylsa, ekinshisi jyl sońynda qaıta iske qosylmaq. Sondyqtan qazir elimizge qumshekerdiń basym bóligi syrttan ákelinip jatyr.
Sholýshy: Aqnur MUHTARHAN
