Atajurtqa kóship kele jatyp, aqpan aıynda Maıqapshaǵaı keden beketinde 50 myń dollar shamasynda aqshasynan aıyrylǵan, kedenshiler tarapynan «kontrabandamen» aınalysty dep aıyptalǵan Gúljan Máýithannyń isin prokýratýra qysqartty dep jazady Qamshy.kz.
Bul týraly atalǵan istiń basy-qasynda bolyp, jesir anaǵa jalpyqazaqstandyq aqparattyq qoldaý kórsetýge muryndyq bolǵan qoǵamdyq ókili Ularbek Dáleıuly óziniń Facebook paraqshasynda málimdedi.
«Aǵaıyndar, súıinshi suraı berýge bolar,
Shyǵys prokýratýrasynan jaqsy habar jetti. Shekarada bar qarjysynan aıyrylǵan Gúljan apaıdyń isi qysqarypty buıyrsa!
Prokýratýranyń arnaıy qaýlysyn erteń alamyz. 4 aı boıy tókken ter, etken eńbek dalaǵa ketpegen syńaıly. Aqshasy qolyna tıse óshýge aınalǵan úmiti qaıta janyp, kóńili ornyna túsip, Qazaq Elindegi tirligin jalǵastyra beredi buıyrsa.
Bul iske atsalysqan aǵalar Erlan Sairov, Muhtar Taıjan, Abzal Quspan, Aizhan Daribaeva qatarly kisilerge, zańgerlerge, azda bolsa qarjylaı qol ushyn sozǵan Rysbek Máýit sıaqty azamattarǵa, ózge de myńdaǵan tileýlesterge aıtar alǵys mol!», - dep jazǵan Ularbek Dáleıuly qýanyshyn jurtpen bólisip.
Eske sala keteıik, 8 aqpan kúni Qytaıdan Qazaq eline oralý maqsatynda kóship kele jatyp, SHQO Zaısan aýdanyna qarasty «Maıqapshaǵaı» kedendik baqylaý beketinde 49,900 AQSH dollary tárkilengen Máýithan Gúljan esimdi jesir ananyń taǵdyry qyl ústinde edi. Kúıeýinen jastaı jesir qalyp, eki balasyn ómirdiń nebir taýqymetin tarta júrip er jetkizgen Gúljan Qytaıdaǵy ózine tıesili úıi men bar dúnıe-múlkin satyp, ol aqshaǵa Astana qalasynan úı alýdy kózdegen eken. Alaıda, qıyn jaǵdaıǵa tap bolamyn dep oılamaǵan.
«Maıqapshaǵaı» kedendik baqylaý beketinde 49900 AQSH dollarynan aıyrylǵan jesir anaǵa baılanysty birinshi sot otyrysy 17 naýryzda Zaısan qalasynda ótken bolatyn. Sot úkimi 234-bap boıynsha Gúljan Máýithanqyzyn aıypty dep tanyǵan. Sonymen qatar, 68 myń teńge aıyppul salyp, qalǵan 40 myń dollardy memleketke kiris retinde aýdarǵan edi. Alaıda, birinshi sot sheshimin ádiletsiz dep narazy bolǵan jurttyń qarasy kóp boldy. 10 sáýir kúni Gúljan Máýithanqyzy Zaısan aýdandyq sotynyń sheshimine kelispeı, SHQO sotyna apelásıalyq shaǵym túsirgen bolatyn. Osy shaǵym boıynsha 1 maýsymǵa sot belgilengen. Oǵan baılanysty 23 mamyrda Astanada kezekti márte baspasóz máslıhaty ótken edi. Maýsym aıynda ótken sot Zaısan qalasynyń shyǵarǵan sot sheshiminiń túgeldeı kúshin joıdy.
Ularbek Dáleıuly atap jazǵandaı, Erlan Saıyrov, Muhtar Taıjan, Abzal Quspan, Aıjan Dáribaeva sıaqty qoǵamdyq tulǵalar zardap shekken anaǵa quqyqtyq, zańdyq kómek kórsetken edi. Sondaı-aq, atalǵan is durys nátıjemen aıaqtalmasa kóshi-qon saıasatyna da salqyny tıetinin bılik pen zań oryndaýshy organdarǵa eskertken bolatyn.
Maıqapshaǵaı keden beketinde kontrabanda degen kúdikpen aqshasy alynyp qoıǵan Gúljan Máýithannyń isi kedendik zańnyń solqyldaq ekenin pash etti. Aqshasynan aıyrylyp qalǵan anany qoǵam jalǵyz qaldyrǵan joq, qalyń el bolyp demep, áleýmettik jelide de úlken qoldaý kórsetti. Alaıda ol kisiniń basyndaǵy jaǵdaı taǵy da qaıtalanbaıdy dep aıtý qıyn. Osyǵan baılanysty Qamshy.kz Atajurtqa bet túzegen qandastarǵa Quqyqtyq keńes jarıalaǵan edi.
