Ortalyq Komýnıkasıalar qyzmeti alańynda Halyqaralyq «EKSPO-2017» kórmesi aıasynda jamby atý boıynsha «Altyn jebe» halyqaralyq týrnırin ótkizýge arnalǵan baspasóz konferensıasy uıymdastyryldy dep habarlaıdy Qamshy.kz aqparat agenttigi. Sharanyń uıymdastyrýshylary: QR Mádenıet jáne sport mınıstrligi, QR «Ulttyq sport túrleri qaýymdastyǵy» jáne «Túrki halyqtarynyń dástúrli sport túrleri qaýymdastyǵy». Áleýmettik seriktes - «Samruk-Kazyna Trust» áleýmettik jobalardy damytý qory.

Jarysqa álemniń 25 elinen 50 jýyq qatysýshy keledi. Bizdiń elden «Altyn jebede» bes sportshy baq synamaq.  Olar: jamby atýdan Qazaqstan Respýblıkasy chempıonatynyń birneshe dúrkin júldegeri, 2016 jylǵy «Uly dala oıyndary» festıvaliniń jeńimpazy atanǵan Eldos Badashev jáne elishilik chempıonatta top jaryp júrgen sańlaqtarymyz Sarybaı Aıtbek, Aıkóz Eralhan, Týlybaev Abzal, Úzdenbaev Bekqalı.

QR «Ulttyq sport túrleri qaýymdastyǵy» Prezıdenti Bekbolat Tileýhannyń aıtýynsha, eshkim júldesiz qaıtpaıdy, júlde qory qomaqty, bes orynǵa deıin báıge bar.  Ulttyq sadaq atýdan álemge aty áıgili Kashshaı Laıosh syndy mergeni bar Majarstannan Chemez Farkas baptaǵan vengr sur mergeni Nametı Krıstof alǵash ret jamby saıysynda baq synamaq. Ózderin túrki jurtynyń bir butaǵy sanap, ejelgi qypshaq urpaǵymyz deıtin Majarstan halqy at ústinen sadaq atý dástúrin uzaq jyldan beri nasıhattaýmen keledi. Vengrıada Eýropa kólemindegi dástúrli sadaq atý jarystary jıi uıymdastyrylady. Qazirgi kezde bútin Eýropaǵa madıar sadaqshylarynyń mergendik dańqy mol jaıylǵan. «Altyn jebe» týrnırine keletin Nametı Krıstof sol kóp mergenniń ishindegi úzdikterdiń biri, – dedi ol.

QR Sport jáne dene shynyqtyrý isteri komıteti tóraǵasy Elsıar Qanaǵatov, Qazaqstan Respýblıkasy Mádenıet jáne sport mınıstrligi búgingi kúni ulttyq sportty ulyqtaýǵa asa úlken kóńil bólip otyr, oǵan dálel «Altyn jebe» saıysy. Bul saıystyń jóni bólek, sebebi Qazaq jerinde «Altyn jebe» týrnıri tuńǵysh uıymdastyrylyp otyr, – dedi Elsıar Baımuhameduly.

Ulttyq sadaqtaryn ulyqtap, sadaq atýdyń halyqaralyq saıysyn eń jıi uıymdastyratyn eldiń biri – Túrkıa. Bul elden ataǵy jer jarǵan bapker Levent Talha men shákirti Murat Bonjýk kelmekshi. Sondaı-aq, Malaızıadan Ahma Dakalan, Polshadan Radoslav Kozých, Rýmynıadan Mihai Cozmei, Fınlándıadan Anna Kataviina Aibvecht, Katardan Walid Khawajkyc, Germanıadan Giulia Josefine Salts syndy kózdegenin múlt jibermes qolmergen sadaqshylar Elordaǵa at basyn tireıdi.  Sonymen qatar, irgedegi kórshilerimiz Qyrǵyzstan, Ózbekstan, Mońǵolıa, Reseı, Qytaı elderiniń mergenderi de Jamby atýdan tuńǵysh ótetin halyqaralyq jarystan tys qalmaqshy emes.