Aqmola oblysy ákiminiń qoldaýymen uıymdastyrylǵan velomarafonǵa qatysqan belgili qazaqstandyq marafonshy, «Gınnes rekordshysy» Balǵabaı Kúlpeısov jolaı Makınsk qalasyna soǵyp ketti. Marafon Býrabaıdaǵy Abylaıhannyń alańynan bastaý alyp, Astana qalasyndaǵy EKSPO qalashyǵyna deıin júrip ótti, dep habarlaıdy Qamshy.kz aqparat agenttigi Aqmola oblysy ishki saıasat basqarmasynyń Óńirlik komýnıkasıalar qyzmetine silteme jasap.

Asa uzaq júgiristerge qatysqany úshin Gınnes rekordtar kitabyna engen tájirıbeli marafonshy Balǵabaı Kúlpeısov 1993 jyldan bastap óziniń marafondaryn «Ulylarǵa taǵzym» degen atpen qazaq elininiń aqyndary men batyrlaryna, tarıhı mańyzy bar datalarǵa jáne oqıǵalarǵa, sonymen qatar belgili saıasatkerler men qoǵam qaıratkerlerine arnap keledi. Mysaly, 2007 jyly sportshy Astanadan ýkraınalyq Dneprodzerjınsk qalasyna deıin 3 500 shaqyrym júgirip ótken. Bul júgiristi marafonshy Ýkraınada ótken Qazaqstan jylyna arnaǵan eken.

Balǵabaı Kúlpeısov kóptegen elderde bolyp, 90-shy jyldarda Qunanbaı men Qajymuqannyń jolyn qaıtalap, Mekkege deıin barǵan. Búginde marafonshy 60 jasta. Óleńder jazyp, ótken ómirinen alynǵan kóptegen qyzyqty oqıǵalarmen bólisýge yntyzar. Basqa elderde ótken marafon júgiristeri kezinde talaı qyzyq ári tanymal adamdarmen kezdeskenin aıtyp otyrady.

Ómirlik ustanymy – «Ashyq bol, sonda seniń aldyńda barlyq joldar ashylady». Marafonshynyń ómirlik ustanymy jáne sportqa degen áýestigi ózgelerge úlgi bolýǵa ábden laıyq.