«Saıası qalam. Trıbýna» gazetiniń bas redaktory bolǵan Janbolat Mamaıdyń qamalǵanyna jarty jyldyń kólemindeı ýaqyt boldy. Aqpan aıynda tutqyndalǵan jýrnalıske qatysty tergeý isi aıaqtalyp, 14 tamyz kúni alǵashqy sot otyrysy ótti. Aqpan aıynan beri ár kúni úmit pen kúdikke toly ótip jatqan Janbolat Mamaıǵa qatysty júrgizilgen sot isine kóz júgirte keteıik.
Opozısıalyq basylym «Saıası qalam. Trıbýna» gazetiniń kezekti basylymy 1 aqpan kúni shyǵýy tıis bolatyn. Alaıda, Janbolat Mamaı BAQ betterine bergen suhbatynda atalmysh gazettiń basshysy tıpografıa qyzmetkerlerine: "Jumystan qýylasyńdar!" dep qorqytyp, gazettiń kezekti sanyn shyǵarmaı tastaǵandyǵyn aıtqan.
«Bul gazettiń jumys istep kele jatqandyǵyna 5 jyl boldy. 1 aqpan kúni ádettegideı gazettiń kezekti sanyn basyp shyǵarmaqshy boldyq. Alaıda, «Bıznes-Inform» tıpografıasynyń jumyskerleri basshylary qorqytyp, atalmysh gazetti basyp shyǵarýǵa tyıym salǵan. Bizdiń bul basylymda UQK basshysy Kárim Másimov jaıly úlken maqala jaryq kórýi tıis edi. Bálkim, sol sebepti de shyǵarmaı tastaǵan bolar. Bul – saıası astary bar másele sekildi...», – dep aıtty Janbolat Mamaı.
Janbolat Mamaı 10 aqpanda tutqyndalyp, kelesi kúni Almaty qalasy Medeý aýdandyq sotynyń sheshimimen eki aıǵa qamaýǵa alynǵan. Tergeýshilerdiń aıtýynsha, ony «BTA bankten urlanǵan qarajatty «Saıası qalam. Trıbýna» gazeti arqyly zańdastyryp kelgen» degen aıyp taǵylǵan. Tergeý kezinde jýrnalıs bul aıyptardy joqqa shyǵaryp, atalmysh istiń saıası astary bar ekendigin aıtqan.
Keıinnen belsendilerden quralǵan «Janbolat Mamaıdy qorǵaý» toby qurylǵan. Janbolat Mamaıdyń advokaty Janar Balǵabaeva jýrnalısi eki aıǵa qamaý jónindegi sot sheshimine apelásıalyq shaǵym túsirgen.
Alaıda sot jýrnalısi qamaýda ustaý týraly sheshimin ózgerissiz qaldyrdy. Aryzdy qaraý jabyq jaǵdaıda ótip, sottyń sheshimin Janbolat Mamaıdyń advokaty Janar Balǵabaeva habarlaǵan. Ol 21 aqpanda Janbolat Mamaımen kezdesip, onyń abaqtydaǵy jaǵdaıyn bilýge tyrysty. Onyń aıtýynsha, túrmede jýrnalıske fızıkalyq jáne moraldyq qysym jasalǵan eken. «Saıası qalam. Trıbýna» gazetiniń jýrnalısi Inga Imanbaı Janbolat Mamaıdyń advokatqa jazǵan ótinishin Facebook jelisindegi jeke paraqshasynda jarıalaǵan. Jýrnalıs óz ótinishinde ómirine alańdaıtynyn jáne basqa kameraǵa aýystyrýyn surap jazǵan. Alaıda mekeme basshysy Baqytjan Baımaǵambetov jýrnalıske abaqtyda qysym jasalady degen aıypty teriske shyǵarǵan.
Eki aıdan keıin Janbolat Mamaıdy qamaý merzimi taǵy eki aıǵa uzartyldy. Medeý aýdanynda ótken tyńdalym jabyq túrde bolyp, oǵan tilshilerdi kirgizbegen.
Keıinnen, maýsym aıynda, Medeý aýdandyq soty Janbolat Mamaıdy qamaý merzimin 10 shildege deıin uzartty. Ádettegideı jabyq túrde ótken tyńdalymǵa jýrnalısi qoldaýǵa kelgen belsendiler men BAQ ókilderi kirgizilmegen.
Opozısıalyq «Saıası qalam. Trıbýna» gazetiniń bas redaktory Janbolat Mamaıdyń jaqtastary ony bosatýdy talap etip, áleýmettik jelide sáýir aıynda Mamay Fest aksıasyn ótkizgen. Belsendiler, jýrnalısi bosatýyn talap etip, oǵan taǵylǵan aıyptardy negizsiz dep tanydy.
28 maýsym kúni jýrnalısi qorǵaý komıtetiniń músheleri dóńgelek ústel, bılikpen qýdalanǵan barlyq jýrnalıserdiń quqyqtaryn qorǵaýdy kózdegen. Olar sóz bostandyǵyn alǵa tartyp, BAQ týraly jańa zań jobasyn synǵa alǵan.
Keıinnen Almaty qalasynda bir top belsendi jınalyp, 30 shildede poshta arqyly Eýropalyq odaqqa, EQYU jáne de birshama halyqaralyq demokratıalyq uıymdarǵa hat joldaǵan. Hatty joldaýshylar birshama bıliktiń qýdalaýyna túsken azamattardyń tizimin atap, saıası tutqyn retinde tanylǵandardyń jaǵdaıyna nazar aýdarýyn suraǵan. Onda Janbolat Mamaıdyń ústinen qozǵalǵan qylmystyq isti qaıta qaraýlaryn talap etken.
Joǵaryda atap ótkenimizdeı, tergeý isi aıaqtalyp, 14 tamyz kúni atalmysh is boıynsha alǵashqy sot otyrysy ótip, advokaty Janar Balǵabaeva ony kepilmen bosatýyn suraǵan. Alaıda, sýdıa ol usynystan bas tartty.
Búgin jalǵasyn tapqan sot prosesinde Janbolat Mamaıǵa qatysty iske BTA bankiniń eks-top-menedjeri Jaqsylyq Jarymbetov kýáger retinde shaqyrylǵan. Ol sotta Janbolat Mamaıǵa aqsha bergendigin aıtty.
BAQ betterinde shyqqan málimetterge sáıkes, Jarymbetov «elge táýelsiz basylym kerek» degen sebeppen jýrnalıs Mamaıǵa qarjylaı kómek kórsetken.
Aıta keter bolsaq, bıyl maýsym aıynda Muhtar Áblázovtyń isi boıynsha Jaqsylyq Jarymbetov shartty túrde qamaýǵa alynǵan.
Opozısıalyq saıasatker Muhtar Áblázov urlaǵan aqshany zańdastyrdy degen aıyppen aqpan aıynda tutqyndalǵan Janbolat Mamaıǵa qatysty kelesi sot otyrysy 21 tamyz kúni ótedi.
Nazerke Labıhan
