Qazaqstandyq sportshy aldaǵy kezdesýge boljamyn jasady dep habarlaıdy Qamshy.kz aqparat agenttigi Vesti.kz saıtyna silteme jasaı otyryp.
Erejesiz jekpe-jekte el namysyn qorǵaıtyn Qýat "Naıman" Hamıtov orta salmaqtaǵy WBA (Super), IBO, WBC jáne IBF tujyrymdary boıynsha álem chempıony qazaqstandyq Gennadıı Golovkın (37-0, 33 KO) men meksıkalyq Saýl "Kanelo" Alvares (49-1-1, 34 KO) arasynda ótetin kezdesýi týraly oıymen bólisti.
"MakGregor – Meıvezer arasyndaǵy kezdesýdiń erte ótetinine baılanysty Golovkın men Alvares arasyndaǵy kezdesý shamaly kóleńkede qalyp qoıdy. Shoý jaǵynan jankúıer jınaý jaǵynan artta qaldy. Sondyqtan da MMA juldyzy men álemniń úzdik boksshysy arasyndaǵy kezdesýdiń jankúıerleri kóp bolady dep oılaımyn.
Golovkın – bizdiń otandasymyz. Árıne, jekpe-jekti tamashalaımyz. Tileýin de tileımiz. Eki boksshy da nokdaýn, nokaýtpen jeńiske jetemiz dep jatyr. Meniń oıymsha, bulaı bolmaıdy. Eki boksshy da osyǵan deıin 12 raýndtyq jekpe-jekten ótkizdi. Biraq Alvareske qaraǵanda Golovkınniń qarsylasy qıyndaý boldy. Sol úshin aldaǵy kezdesý de 12 raýndqa sozylady dep oılaımyn.
Eki boksshynyń da soqqysy myqty. Rıngti jaqsy sezinip, erkin qımyldaıdy. Degenmen de Alvares Golovkınge qaraǵanda shapshańdaý. Sheberligi de arty tústi. Bizdi qyzyq jekpe-jek kútip tur. Golovkınge upaı sany boıynsha jeńiske jetý qıyn bolady. Óıtkeni, bul boks keshin "Kanelonyń" komandasy uıymdastyryp jatyr. Eger tipti Golovkın jekpe-jek kezinde basym bolsa da, báribir jeńisti meksıkalyq boksshyǵa beredi. Golovkın upaı sany boıynsha jeńiske jetý úshin Alvaresti keminde eki ret nokdaýnǵa túsirýi kerek. Birinshi ret altynshy raýndqa deıin, ekinshi ret altynshy raýndtan keıin.
Golovkınniń denesi iri ári tájirıbesi molyraq. Sondyqtan Golovkın nokaýtpen jeńiske jetýi yqtımal. Ol qalaı da jeńiske jetýi kerek", – deıdi Hamıtov.
Eske salaıyq, Golovkın men Alvaresti dopıngten VADA uıymy teksergen. Eske salaıyq, bul eki boksshy arasyndaǵy jekpe-jek 16 qyrkúıek kúni Las-Vegastaǵy (AQSH, Nevada) T-Mobile Arena arenasynda ótedi. Saýl Kanelo Alvareske qarsy jekpe-jekte Gennadıı Golovkın orta salmaqta WBC, WBA (Super), IBF jáne IBO chempıondyq ataqtaryn qorǵaıdy. Meksıkalyq "The Ring" jýrnalynyń belbeýin báske tigedi.
