Elbasynyń «Bolashaqqa baǵdar: rýhanı jańǵyrý» maqalasynda aıtylǵan ulttyq kodymyzdy jańǵyrtý maqsatynda ońtústik qazaqstandyq ónertapqysh dombyranyń elektrondy nusqasyn oılap taýyp, qoldanysqa engizdi, dep habarlaıdy Qamshy.kz aqparat agenttigi OQO ákimdiginiń baspasóz qyzmetine silteme jasaı otyryp.
Endi dombyrany uıaly telefonyńyzdan tartyp, án shyrqaýyńyzǵa bolady. Eger úırengińizge kelse, tegin júkteýge de múmkindik týyp otyr. «Apple» kompanıasy maquldaǵan bul baǵdarlamanyń avtory – ońtústik qazaqstandyq İT maman Nurlan Qambar. Ónertapqysh jigit atalǵan baǵdarlamany jýyrda ǵana AQSH-taǵy «Apple» kompanıasyna maquldatyp, avtorlyq quqyq ıesi atandy.
Búginde Nurlan Baýyrjanuly Almatydaǵy Súleımen Demırel atyndaǵy Ýnıversıtetiniń aqparattyq júıeler mamandyǵynyń 2-kýrsynda oqıdy. Jastaıynan oqýda ozat bolyp, zeıini zerek ósken Nurlannyń aldaǵy armany - ataqty İT maman ataný.
Dombyranyń elektrondy nusqasyn oılap tapqan 20 jasar jigitke bul ıdeıa Astanadaǵy EKSPO kórmesine barǵanda kelipti. Nurlannyń bul ıdeıasyn iske asyrýǵa «qazaqstandyq Stıv Djobs» atanyp ketken Arman Súleımenov aqyl-keńes beripti.
«Qazirgi tańda qazaq jastary jańashyldyqqa umtylyp, jańa tehnologıalardy ıgerýge kúsh salyp jatyr. Solardyń biri retinde men de óz baǵymdy synap kórýdi jón sanap, alǵashqy eńbegimdi júzege asyrýǵa tyrystym. Bul baǵdarlamanyń bir ereksheligi – dombyra úırenýge ári dombyra joq jerde uıaly telefonnan kúı nemese án tartýǵa múmkindik beredi. Atalǵan baǵdarlamany myna siltemeden myna siltemeden tegin júktep alýyńyzǵa bolady», - deıdi ónertapqysh.
Búginde ol jazǵy demalys kezeńin paıdalanyp Astana qalasyndaǵy Nazarbaev ýnıversıtetindegi İT mamandardan arnaıy sabaq alyp júr.
