Ústimizdegi jylǵy 22 tamyzda Astanada Qazaqstan Respýblıkasy Syrtqy ister mınıstriniń orynbasary Roman Vasılenkonyń jáne Aýstrıa Respýblıkasynyń Ǵylym, zertteýler jáne ekonomıka Federaldy vıse-mınıstri Bernadette Gırlıngerdiń teń tóraǵalyǵymen Ekonomıkalyq, aýyl sharýashylyǵy, tabıǵatty qorǵaý, ónerkásiptik, tehnıkalyq jáne tehnologıalyq yntymaqtastyq jónindegi Qazaqstan-Aýstrıa úkimetaralyq komısıasynyń 8-shi otyrysy ótti dep habarlaıdy Qamshy.kz aqparat agenttigi QR SİM silteme jasaı otyryp.
Otyrys barysynda taraptar ekijaqty kún tártiptiń ózekti máselelerin, sonyń ishinde Qazaqstan Respýblıkasy men Aýstrıa Respýblıkasynyń ekonomıkalyq ahýaly, ekijaqty yntymaqtastyqtyń qazirgi jaǵdaıy men bolashaq múmkindikteri boıynsha dástúrli túrde pikir almasty.
Delegasıalar, sonymen qatar, Qazaqstan-Aýstrıa yntymaqtastyǵynyń energetıka, taý-ken qazý ónerkásibi, qorshaǵan ortany qorǵaý tehnologıalary, kólik jáne ınfraqurylym, aýyl sharýashylyǵy, densaýlyq saqtaý, sondaı-aq óńiraralyq jáne kópjaqty yntymaqtastyqty damytý salalaryndaǵy ózekti máseleler men múmkindikterdi talqylady.
Komısıa otyrysynyń sheńberinde aýstrıalyq tarap EKSPO-2017 halyqaralyq kórmesi sheńberinde ótkizilgen is-sharalarǵa egjeı-tegjeıli toqtaldy. Óz kezeginde R.Vasılenko aýstrıa delegasıasy atalǵan kórmege sapaly túrde daıyndalǵany jáne joǵary deńgeıde qatysqany úshin alǵysyn bildirdi.
Buǵan qosa taraptar Aýstrıanyń EKSPO-2017 is-sharalary aıasynda ú.j. 14 maýsymda eki el bıznes delegasıalarynyń qatysýymen ótken Qazaqstan-Aýstrıa iskerlik keńesiniń kezekti kezdesýin rızashylyqpen atap ótti.
Eki el arasyndaǵy syndarly saıası dıalog sátti ekonomıkalyq yntymaqtastyqtyń kepili bolyp tabylatyny atalyp ótti. Qazaqstandyq dıplomattyń aıtýynsha, 2017 jyldyń birinshi jartysynda Qazaqstannyń EO elderimen syrtqy saýda aınalymy 2016 jyldyń kórsetkishimen salystyrǵanda shamamen 30%-ǵa ulǵaıyp, 14,733 mlrd. AQSH dollaryn qurady. Bul rette 2016 jyldyń qorytyndysy boıynsha Qazaqstan TMD elderi arasynda Aýstrıanyń Reseıden keıingi ekinshi eń iri saýda seriktesi boldy.
Sondaı-aq R.Vasılenko saýda-ekonomıkalyq qarym-qatynastardyń órbýine halyqtyń jumylǵyshtyǵy men azamattar arasyndaǵy tikeleı baılanystar jeteleıtinine nazar aýdardy. Osy oraıda, Qazaqstan 2015 jyly qol qoıylǵan QR men EO arasyndaǵy Keńeıtilgen áriptestik jáne yntymaqtastyq kelisimimen qarastyrylǵan vızalyq rejımdi jeńildetý máselesine zor kóńil bóledi. Bul turǵyda basqosý barysynda atalǵan baǵyt boıynsha progreske qol jetkizý perspektıvalary talqylandy.
Komısıa otyrysynyń qorytyndylary boıynsha teń tóraǵalar talqylanǵan máselelerdi tolyǵymen qamtıtyn Protokolǵa qol qoıdy.
