Ninety one tobynyń ánshisi Danıar Qulymshınnyń ata-anasy Aqylbaı Qulymshın men Álıa Qydyrova halyqtyń súıiktisine aınalǵan Mýzart tobynyń músheleri Meırambek Besbaev pen Sáken Maıǵazıevke ashyq hat joldady, – dep habarlaıdy Qamshy.kz aqparat agenttigi. Ashyq hatta ata-ana ózderiniń ulyna durys tárbıe bergendigin jáne qoǵamdaǵy jaǵymsyz pikirlerge 2 jyl boıy shydaǵandaryn aıtqan. Danıardyń ata-anasy tanymal ánshilerge óz renishin Instagram áleýmettik jelisi arqyly bildiripti.
«Bir suhbatynda Sáken Maıǵazıev ádettegisinshe Ninety One toby týraly oı tolǵap, "Adam tanıtyndaı, meıirlene qushaqtaıtyndaı, súıetindeı, ata-analary qalaı jaqsy kóretinin men bilmeımin. Qalaı olarǵa úıretpeıtinin, meniń júregim aýyrady. Ózim úshin emes, urpaqtarym úshin", – depti. Atap aıtsaq, Sáken budan buryn da top músheleriniń bolmysyna syn aıtyp, birese jaqtap, birese dattap júrgen-di. 2 jyl úndemeı kele jatqan bizge, bul sózder shekten shyqqandyq bolyp kórindi. Qanattyǵa qaqtyrmaı, tumsyqtyǵa shoqtyrmaı, bar bilgenimizdi úıretip, ósirip jatqan balalarymyzǵa til tıgizip qana qoımaı, olardyń ata-analarynyń, ıaǵnı bizdiń bergen tárbıemizdi joqqa shyǵarmaq bolǵan sózderi bizdiń qolymyzǵa qalam alyp, osy ashyq hatty joldaýǵa májbúrlep otyr", – deıdi renjigen ata-ana. Sonymen birge aty shýly topty qorǵaǵan ata-ana Meırambek Besbaev pen Sáken Maıǵazıevtiń maqsaty qandaı ekenin bilgisi keletinin ashyq aıtqan. Sonymen birge, ata-ananyń aıtýy boıynsha balany sahnadaǵy juldyzdar emes, úıdegi ata-ana durystap tárbıeleý kerek eken.
"91 (Ninety one) tobyndaǵy balalarymyzdyń "tárbıesi" jaıly sóz qozǵap, jón kórsetýge, qala berdi, bizdi, ata-analaryn sóz qylýǵa eshkimniń haqysy joq. Balalarymyz ónerlerine súıenip, ánderin jazyp, bılerin bılep, halyqtyń aldynda qalaı erkelese de, qalaı júrse de óz erikteri. Kezinde sizderdiń ánderińizdi tyńdap, ónerlerińizge súısinip, qurmettedik, maqtan ettik. Endi sizderdiń bizdiń balalarymyzdyń bastamalaryna qabattasýlaryńyzǵa jol bolsyn? 91 toby jańa zamanǵa laıyqtalǵan janrda óner kórsetip, álemdik pop mýzyka yrǵaqtarynsyz jańa zaman tynysyn sezine almaıtyn óskeleń urpaq, jas býynnan turatyn ózindik pýblıkasy bar top. Bizdiń balalarymyz, áýeli Allanyń amanatynda, odan qaldy ózimizdiń baqylaýymyzda. Dúıim qazaq jastarynyń tárbıesi osy bes jigittiń qolynda emes. Balany tárbıeleý – sahnadaǵy bes jigittiń emes, úıdegi ata-ananyń mindeti. Al kimde-kim balasyn tárbıeleı almasa – kiná ózinen. Ony sahna juldyzdarynan kórýdiń túkke qajeti joq. Mýzykant, ánshi retinde mýzykalyq janrlaryn, jasaǵan dúnıelerin: sıngl, álbom, paıym, beınebaıandary jaıly syn, kem tustaryn aıtsańyzdar óz erikterińiz. Al, jeke basqa tıisip, ata-analarynyń bergen tárbıelerine kúmán keltirý – shekten shyqqandyq bolyp tabylady. Biz uzaq ýaqyt úndemeı keldik. Sebebi bizdi ishki mádenıetimiz salǵylasyp, bet jartysyp jatýǵa jibermedi. Áli de "qazaqshyldyq" tanytyp otyrǵanymyzdy qaperlerińizge ustaǵaısyzdar! Biz bar bilgenimizdi boıyna sińirip, alaqanymyzǵa salyp ósirgen balalarymyz jaıly aıtylyp jatqan ǵaıbat sózderge qosylyp, tipti, bergen tárbıemizge kúmán keltirip otyrǵandar ózimiz esti dep sanap kelgen Sáken men Meırambek bolǵany qynjyltty», – dep hatty aıaqtaǵan.
