Áıgili Baýyrjan Momyshulynyń kelini, jazýshy, qazaqy salt-dástúrlerdi nasıhattaýshy  Zeınep Ahmetova qazaq qyzdarynyń toıda kıetin kóılekterin synǵa aldy.
«Qyzdar, aınalaıyndar, turmysqa shyǵatyn kezde toıǵa ıyǵy men keýdesi ashyq, jotasy jalańash, sheteldik úlgidegi aq kóılekti kımeńdershi, bas tartyńdarshy sodan! Nege osy biz ózgeniń qańsyǵyna tańsyq bolamyz da júremiz? Bar ǵoı, qazaqtyń ádemi kóılekteri, sáýkelesi! Tipti, arnaıy tiktirýge de bolady. Toıǵa keletin úlken qarıalardyń, aqsaqaldardyń, aq jaýlyqty ájelerdiń kózinshe jańa túsken kelinniń ashyq-shashyq júrýi jaraspaıdy. Toı aldynda betashar jasaıtynymyz taǵy bar. Ózi jartylaı jalańash júrgen kelinniń betin ashýda ne mán qalady? 
Taǵy bir túıtkil: jas kelinniń gúl laqtyrýy. Ol teris qarap turady da, qolyndaǵy shoq gúldi art jaqqa qaraı laqtyrady. Ol jerde kúıeýge shyqpaǵan bir top jas qyz ýlasyp-shýlasyp jatady. Syrttaı qarap tursań, osynyń ózi ersi emes pe? Sol toıda álgi jas boıjetkenderdiń áke-sheshesi, aǵa-jeńgesi, aǵaıyn-týysy otyr. Qansha baısyrap bara jatsań da, solardyń kózinshe «tezirek kúıeýge tıeıin» dep gúlge sonsha talasyp ne kórindi?», – deıdi Zeınep Ahmetova.

«Kóp jasaǵannan surama, kópti kórgennen sura», – deıdi qazaq. Kelindik qyzmettiń qatal synynan ótken Zeınep Ahmetovanyń ósıeti jas kelinderge úlgi bolary anyq.